Almaniyanın xarici işlər naziri vəzifəsini tezliklə Yohan David Vadeful tutacaq. 62 yaşlı siyasətçi ölkənin yeni kansleri Fridrix Merzin yaxın silahdaşı hesab edilir. Sağ-mərkəzçi Xristian Demokrat İttifaqının (CDU) nümayəndəsi olan Vadeful Yaşıllar Partiyasından olan Annalena Berboku əvəz edəcək.
“Yeni Müsavat” qeyd edir ki, Vadeful Azərbaycan üçün yad sima deyil. Vadeful Almaniya Bundestaqının Xristian-Demokrat/Xristian-Sosialist İttifaqı fraksiyasının xarici, təhlükəsizlik və müdafiə siyasəti üzrə sədr müavini, Almaniya-Cənubi Qafqaz parlament qrupunun sədri vəzifəsini tutub. O, bu vəzifədə bir neçə dəfə Azərbaycan rəsmiləri ilə bir araya gəlib. Deputat kimi ötən il Münhen Təhlükəsizlik Konfransında Prezident İlham Əliyevlə görüş keçirib.
O, Vətən müharibəsindən əvvəl dəfələrlə Qarabağın işğal olunmuş Azərbaycan ərazisi olduğunu bildirib. “Bir məsələ aydındır: Azərbaycan ərazisi Ermənistan tərəfindən qeyri-qanuni işğal edilib”, - o, Xocalı qırğınının 27-ci ildönümü münasibətilə simpoziumda söyləmişdi.
Modern.az-a açıqlamasında Milli Məclisin Azərbaycan-Almaniya Parlamentlərarası İşçi Qrupunun üzvü Azər Badamov bildirib ki, Yohan David Vadeful ədalətli siyasətçidir. Onun fikrincə, yeni XİN rəhbəri Almaniya-Azərbaycan münasibətlərinin inkişafına xidmət edən siyasi kursu dəstəkləyəcək.
Amma buna nə dərəcədə nail ola biləcək? Çünki 2 apreldə Almaniya Prezidenti Frank-Valter Ştaynmayerin ölkəmizə səfəri ərəfəsində qalmaqal yaşanmışdı. O, Ermənistanda olarkən sosial media hesabında keçmiş qondarma rejimin əski parçasını paylaşmış, rəsmi Bakının etirazına səbəb olmuşdu. Sonra paylaşım silindi, üzrxahlıq edildi. Lakin alman prezident Bakıdan gedər-getməz ölkəsinin dövlət televiziyasında Qarabağın “mübahisəli ərazi” olduğu barədə süjet yayımlandı.
Bu baxımdan Almaniyanın yeni baş diplomatı ziddiyyətləri aradan qaldıra biləcəkmi?
Azərbaycan-Almaniya Parlamentlərarası İşçi Qrupunun digər üzvü Elşad Musayev “Yeni Müsavat”a açıqlamasında Almaniyanın dünyada sayılıb-seçilən ölkələrdən biri olduğunu qeyd etdi. Onun sözlərinə görə, bu dövlət iqtisadi potensialı ilə Avropada liderdir: “Azərbaycan da belə bir gücə malik ölkə ilə münasibətlərin inkişafda olmasında maraqlıdır. Almaniya Prezidenti də ölkəmizə səfər etmişdi. Əvvəlki xarici işlər nazirinin Ermənistandan yana çıxışları olub. Bu da bizi qane edə bilməzdi. İndi yeni xarici işlər nazirindən gözləntilərimiz var”.
E.Musayev xatırlatdı ki, alman nazirin Prezident İlham Əliyevlə ötən il Münxen Təhlükəsizlik Konfransı çərçivəsində görüşü də olub: “Hər halda, belə bir diplomatın xarici işlər naziri olması ümidvericidir. Güman edirik ki, əlaqələrin güclənməsinə töhfə verəcək. Bu günə qədər olan fəaliyyəti belə deməyə əsas verir”.
Onu da deyək ki, Xristian-Demokrat İttifaqının lideri Fridrix Merz Bundestaqda Almaniyanın yeni, 10-cu kansleri kimi and içib. Mərasimi “Phoenix” telekanalı yayımlayıb. “Alman xalqının rifahı naminə çalışacağıma, onun sərvətini artıracağıma, onu zərərlərdən qoruyacağıma, əsas Qanunu və federasiya qanunlarını qoruyacağıma, vəzifə borcumu vicdanla yerinə yetirəcəyimə və hər kəsə qarşı ədalətli olacağıma and içirəm. Qoy Tanrı mənə kömək olsun”, - deyə Merz bildirib.
Onilliklər ərzində ilk dəfə olaraq Almaniyanın kansler və xarici işlər naziri postları yenidən bir partiyanın - sağ mərkəzçi Xristian Birlik İttifaqının əlində olacaq. Yeni kansler Fridrix Mertsin yaxın tərəfdaşı hesab olunan Vadeful 2009-cu ildən bəri Bundestaqın üzvüdür. Xristian Birlik İttifaqının parlament qrupunun vitse-prezidenti olaraq o, xarici siyasət və təhlükəsizlik məsələlərinə cavabdeh olub.
Avropa İttifaqının doqquz ölkəsi ilə strateji tərəfdaşlıq haqqında sənədin imzalanması göstərir ki, Azərbaycan Avropa üçün strateji əhəmiyyət daşıyan ölkədir. Azərbaycan Avropa İttifaqının aparıcı ölkələrindən biri olan Almaniya ilə də fəal əməkdaşlığa malikdir. Azərbaycan və Almaniya arasında davamlı siyasi dialoq mövcuddur, iqtisadiyyat və humanitar sahələrində geniş əməkdaşlıq həyata keçirilir. Bir müddət əvvəl Almaniya Prezidenti Frank Valter Ştaynmayerin ölkəmizə rəsmi səfəri də əlaqələrimizin inkişafı baxımından böyük əhəmiyyət kəsb edir.
