Siyasi dialoq və milli həmrəylik faktoru bütün cəmiyyətlər üçün hər zaman aktuallığını qoruyub saxlayan məsələdir. Azərbaycanda siyasi dialoq və milli həmrəyliyin təzahürü xüsusən, 44 günlük Vətən müharibəsindəki tarixi Zəfərimizdən sonra ən üst səviyyəyə yüksəlib. Prezident İlham Əliyevin təşəbbüsü ilə ölkədə siyasi dialoq mühiti geniş şəkildə təşviq olunur. Eyni zamanda, siyasi dialoq mühitinin təşviqi ilə yanaşı, yeni siyasi mədəniyyətin formalaşması, yeni siyasi konfiqurasiyanın təməllərinin möhkəmlənməsi prosesi də uğurla davam edir. Bu kontekstdə ölkədə fəaliyyət göstərən siyasi partiya sədrlərinin işğaldan azad edilmiş ərazilərə birgə səfərlərinin təşkili artıq ən yeni tariximizin müsbət ənənələrindən birinə çevrilir. Siyasi dialoqun təşviqinə xidmət edən bu səfərlər, eyni zamanda birlik və həmrəyliyin təzahürü kimi qəbul edilir. Ölkənin siyasi partiya rəhbərlərinin, ictimai xadimlərinin, politoloqlarının, media təmsilçilərinin bir araya gəlib işğaldan azad edilmiş ərazilərimizə birgə səfər etmələri artıq ənənə halını almaqla yanaşı, yeni reallıq kimi qəbul edilir. Ümumilikdə 80 nəfər olmaqla, 24 siyasi partiyanın sədr və nümayəndələri, habelə politoloqlar, siyasi şərhçilər, internet televiziyalarının rəhbərləri, jurnalistlər bu dəfə Laçına səfər ediblər. Səfər çərçivəsində Zabuxçay su anbarı, Laçın şəhəri, o cümlədən Heydər Əliyev küçəsi, “Lacinema” kino mərkəzi, “Hoçazfilm” kinopavilyonu və Bəylik kəndində aparılan bərpa və yenidənqurma işləri ilə tanışlıq olub. Habelə “Zerti Aqro-Sənaye Parkı”nda fəaliyyət göstərən müəssisələr haqqında bizə ətraflı məlumatlar verilib. Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyev Laçın şəhərində səfər iştirakçıları qarşısında çıxış edərək ötən dövr ərzində Prezident İlham Əliyevin təşəbbüsü ilə ölkədə davamlı şəkildə təşviq olunan həmrəylik mühitinin strateji əhəmiyyəti və mövcud istiqamətdə görülmüş işlər haqqında geniş məlumat verib.
"Cümhuriyyət" qəzetinin baş redaktoru, "Cebhe.info" xəbər portalının direktoru Rəfail Becanov "Sherg.az"a deyib ki, Azərbaycan cəmiyyəti yeni siyasi mədəniyyət, sivil münasibətlər sistemində yaşayır. Baş redaktorun sözlərinə görə, bu gün özümüzün siyasi həmrəylik və milli birlik nümunəmiz var:
"Gələcəkdə təhlillər, analizlər aparılaraq, bu münasibətlər sistemi bir nümunə kimi istər ölkəmizdə ayrı-ayrı sahələrdə, istərsə də beynəlxalq təcrübədə öyrəniləcək, tətbiq olunacaq. Ölkənin inkişafının təməl prinsiplərindən biri cəmiyyətin milli birliyi, həmrəyliyidir. Bunun üçün isə ən zəruri hal siyasi mühitdə qarşılıqlı etimadın formalaşması, siyasi qüvvələr arasında dialoq və milli prioritetlərin birgə qorunması, müdafiəsi, həmrəylik formulunun cəmiyyətin bütün sferalarına inikasıdır. Ölkəmizdə bu mərhələ başlayanda bəzən inamsızlıq, bəzən nəticənin olmaması kimi qorxular olsa da, zaman göstərdi ki, proses həqiqi milli birliyə xidmət amalı daşıdığından qarşılıqlı etimada əsaslanan birlik mümkünsüz deyil. 2019-cu ildə Prezident İlham Əliyevin tapşırığı ilə başlayan siyasi kurs uğurlu nəticələrinə görə bu gün cəmiyyətin təqdir etdiyi əsas siyasi kampaniyalardandır. Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyev tərəfindən ardıcıl strateji xətt olaraq aparılan proses ölkədə siyasi həmrəylik və milli birlik Platformasına çevrilib".
Millət vəkili, Ədalət, Hüquq, Demokratiya Partiyası sədrinin müavini Elçin Mirzəbəyli də deyib ki, Azərbaycanın siyasi partiyaları cüzi istisnalar olmaq şərti ilə hər zaman milli məsələlərdə ortaq mövqedən çıxış ediblər:
"Bu, ölkənin siyasi həyatı üçün çox vacib fəaliyyətlərdən biridir. Bu proses 2019-cu ildən etibarən başlayıb və daha sürətli şəkil alıb. Şübhəsiz ki, bu prosesə təkan verən amillərdən biri də bizim böyük Zəfərimizdir".
ReAL Partiyasının sədri Natiq Cəfərli bildirib ki, artıq bir neçə ildir ki, Azərbaycanda yeni siyasi mühit formalaşıb:
"İqtidar və müxalifət partiyaları arasında ciddi dialoq mərhələsi başlayıb. Bu dialoq prosesi kifayət qədər məsələlərin effektiv həll yollarının tapılmasında çox yaxşı ab-hava yaradır".
