“Ermənistan son zamanlar dünya miqyasında Azərbaycan əleyhinə informasiya müharibəsi aparmağa başlayıb”.

Bu sözləri politoloq Qulamhüseyn Əlibəyli “Cebheinfo.az”-a açıqlamasında deyib.

O bildirib ki, rəsmi İrəvan Azərbaycana “təcavüzkar” kimi qiymət verilməsinə çalışır: “Bu istiqamətdə beynəlxalq təşkilatlarda və Avropa dövlətlərində ölkəmiz əleyhinə qətnamə qəbul etdirmək istəyirlər. Ermənistan bu yolla beynəlxalq aləmdə Azərbaycanı nüfuzdan salaraq, özünü “sülhpərvər” kimi qələmə vermək istəyir. Bu arqumentlərdən biri də Azərbaycanın hücumu nəticəsində yeni müharibənin olacağı idi”.

Ekspert diqqətə çatdırıb ki, İrəvan hakimiyyəti tərəfindən vaxtaşırı olaraq bu iddia gündəmə gətirilirdi: “Üstəlik, son zamanlar Azərbaycanla Ermənistan arasında sülh müqaviləsinin imzalanma ehtimalı artıqca bu iddiaları daha da gücləndirdilər. Bu isə daha çox Ermənistanın rəsmi kanalları vasitəsi ilə yayılırdı. Rəsmi İrəvan bu addımı ilə həm Ermənistan cəmiyyətində xof yaratmaq, həm də Azərbaycan haqqında mənfi imic formalaşdırmağa nail olmaq istəyirdi”.

Politoloq Ermənistanın Baş naziri Nikol Paşinyanın Azərbaycanla yeni müharibə olmayacağına dair açıqlamasına da münasibət bildirib:

“Görünən odur ki, İrəvan hökuməti artıq bu və ya digər formada üçüncü müharibə fikrini geri çəkmək istəyir. Paşinyanın parlamentdəki son çıxışının da bununla əlaqəli olduğunu düşünürəm. O, həm də Ermənistanın müharibə etmək niyyətində olmadığını deməklə, hər şeyi Azərbaycanın üzərinə yıxmağa çalışır. Bəlkə də, Ermənistan bir qədər zaman qazanmaq üçün bu üsuldan istifadə edir”.

Qulamhüseyn Əlibəyli hesab edir ki, Paşinyan açıqlamalarında səmimi deyil:

“Hər zaman olduğu kimi, Nikol Paşinyanın açıqlamalarının səmimi olduğuna inanmıram. Çünki onun açıqlamaları səmimi xarakter daşımır. Paşinyan həmişə hansısa məqsədləri nəzərdə tutaraq açıqlamalar verir. O, ya ölkəsində, ya da beynəlxalq aləmdə olan siyasi vəziyyəti nəzərdə tutur. Ümumiyyətlə, Paşinyan səmimi siyasətçi olmadığına görə onun sözlərinə də inanmaq doğru deyil”.