Ötən həftədən yağan qar paytaxt sakinlərinin həyatına ciddi təhlükə yaradıb.
Avtomobillərin və piyadaların hərəkətində ciddi məhdudiyyət yaranıb.
Hidrometeoroloqlar bir neçə gün əvvəldən havanın kəskin dəyişəcəyi, qar yağacağı, şaxta olacağı barədə aidiyyəti qurumları xəbərdar etsə də, müvafiq qurumlar "Bakıya qar yağmır" prinsipinə dayanaraq qabaqlayıcı tədbirlər görmədilər.
Beləcə, yağan qar şəhər təsərrüfatına məsul qurumların yarıtmaz fəaliyyətini bir daha üzə çıxartdı. Yolların buz bağlaması səbəbindən bir neçə gündür şəhər sakinlərinin hərəkəti məhdudlaşıb, yollarda təhlükəli hal və qəza şəraiti yaranıb. İctimai nəqliyyatın da hərəkəti iflic vəziyyətə düşüb, avtobuslar gecikib (bəziləri ümumiyyətlə, işləmədi), səkilər isə piyadaların qəniminə çevrilib. Qeyd edək ki, marketlər, ofislər, şirkətlər və s. yerləşdiyi məkanların qarşısına düzülən sürüşkən tametlər, mərmərlər sözün həqiqi mənasında piyadaların kabusuna çevrilib. Şəhərin bütün səkiləri şüşə kimi buz bağlayıb. Piyadalar üçün hərəkət etmək çox təhlükəli hal alıb. İnsanların sürüşüb xəsarət almasına səbəb olan bu mərmərlər təkcə market, şirkət kimi ərazidə olsa dərd yarıdır. Eyni zamanda parklarda, meydanlarda, yeraltı piyada keçidlərindəki pilləkənlərdə də həmin vəziyyətdir. Həmçinin bir neçə ildir ki, yolların qırağına mərmər bordür daşları vurulur ki, onlar da yağışlı və qarlı havada ora ayaq qoyan insanların yıxılmasına gətirib çıxarır.
Təhlükəli olduğu halda bu cür materiallardan niyə istifadə edilir?
Sağlam Cəmiyyət Hərəkatının rəhbəri, sosioloq Elçin Bayramlı da "Sherg.az"a açıqlamasında qarlı və şaxtalı hava şəraitində səkilərdə yeriməyin avtomobil şütüyən yollarda gəzməkdən daha təhlükəli olduğunu deyib. Onun sözlərinə görə, qar yağan kimi Bakıda nəinki səkilər, piyada keçidləri, parklarda da hərəkət təhlükəli olur:
"Şəhərdəki bu biabırçı vəziyyət uzun illərdir müzakirə olunur, çıxış yolları axtarılır, həll yolları təklif edilir. Onu deyim ki, Bakıda səkilərə, piyada keçidlərinin ətrafına vurulan mərmərləri sökmək, başqa daşlarla əvəzləmək vəsaiti kül kimi havaya üfürməkdir. Əvvəldən bu məsələyə diqqət edilməli idi. Piyada keçidini, səkini piyadaların təhlükəsizliyi üçün yaradıblar. Amma piyadalar qarlı havada səki ilə, piyada keçidləri ilə gedəndə, parklarda hərəkət edəndə sürüşüb xəsarət alırlar. Çünki sözügedən yerlərdə yerə döşənilən daşlar xizək kimi sürüşkəndir. Mərmər daşların sürüşkən olmasının əsas səbəbi də onların hamar və suyu yaxşı hopdurmayan səthə malik olmasıdır.
Qar və buz asanlıqla üzərində qalır və sürüşkən bir təbəqə əmələ gətirir. Odur ki, qarlı havada hərəkətdə olan piyadalar səkilərdə ehtiyatlı olmalıdır. Yol kənarında olan obyektlərin sahibləri isə mümkün olduqca qum və ya duz səpərək səthi daha az sürüşkən hala gətirməlidir. Çünki səkilər bəzən yolun hərəkət hissəsindən tez donur. Belə yerlərdə buz olmasa da, yerdə azca qar olması çox ciddi sürüşmə effekti yara bilir. Odur ki, belə havada imkan daxilində altı sürüşməyən ayaqqabılardan istifadə etmək məsləhətdir.
İnsanların addımları gündüz vaxtı qarın əriməsinə səbəb olsa da, gecə havanın soyuması ilə donub buzlaşmasına gətirib çıxarır. Ona görə də insanların diqqətli olması, uyğun ayaqqabı geyinməsi və ehtiyatla hərəkət etməsi vacibdir.
Statistika da göstərir ki, qarlı-buzlu küçələrimizdə piyada hərəkət edərkən yıxılaraq ciddi travma (xüsusən qol-qıç sınıqları) alan insanların sayı yol-nəqliyyat hadisələrində travma alanların sayından bəzən 5 dəfə çox olur".
E.Bayramlının sözlərinə görə, onlarla insanın xəsarət almasına, şikəst qalmasına səbəb olan bu problem ölkədəki kadr problemindən qaynaqlanır:
"Müvafiq qurumlara savadlı və işinin peşəkarı olan kadrlar əvəzinə kimin gəldi təyin edilməsi şəhər infrastrukturunda norma və standartlardan kənara çıxılmasına zəmin yaradır. Bəzək düzəkli daşlar düzməklə gördükləri işin dəyərini qaldırmaq, artıq pullar mənimsəmək siyasəti yeridirlər.
Problemin fundamental səbəbi isə bizim cəmiyyət olaraq keyfiyyətə yox, görünüşə fikir verməyimizdən qaynaqlanır. Tək yollarımız yox, bütün həyat tərzimiz, geyimimiz, ev əşyalarımız da belədir. Psixoloji olaraq ancaq görüntü ilə maraqlanırıq. Bakının yaşıllığını məhv edib şəhərin hər yerini dekorativ ağaclarla niyə bəzəmişiksə, şəkillərdəki asfalt örtüyünü qazıyıb bəzəkli, sürüşkən daşları da o səbəbdən düzmüşük.
Məmurlarımız da bu səbəbdən bir iş görən kimi görüntüyə hesablanmış addım atırlar. Bu artıq psixoloji xəstəlikdir. Bizim cəmiyyətin çox ciddi dəstəyə ehtiyacı var".
