Sabah - iyulun 8-də Sabunçu Rayon Məhkəməsində hakim Tahirə Əsədovanın sədrliyi ilə Azərbaycan vətəndaşı Seymur İsrafil oğlu Quliyevin Milli Məclisin hazırkı deputatı Əliabbas Salahzadə, onun həyat yoldaşı Xatirə Allahşükür qızı Salahzadə, deputatın atası, eks-deputat Hacı Qalib Salahzadə və digər şəxslərə qarşı iddiası üzrə məhkəmə prosesi davam etdiriləcək.
Ötən məhkəmə açıq elan edilsə də, faktiki olaraq qapalı keçirilib. İclasda iştirak etmək üçün Sabunçu Rayon Məhkəməsinin binasına gələn jurnalistlər zala buraxılmayıblar. Bundan başqa, hakim növbəti iclasın iyulun 22-də keçiriləcəyi elan edib. Mətbuat da bu haqda xəbər yazıb. Bundan sonra məhkəmə iclasının vaxtı iyulun 8-nə dəyişdirilib. İddiaçı Seymur Quliyev deyir ki, Qalib Salahzadə Sabunçu Rayon Məhkəməsinə “öz evinə gəlirmiş kimi” gəlib-gedir.
İyunun 24-də məhkəmə iclasına Qalib Salahzadə, onun deputat oğlu Əliabbas Salahzadə, gəlini Xatirə Allahşükür qızı və digəriləri qatılmayıblar: “Bu adamlar özlərini qanundan üstün sayırlar. Prezident deyir ki, hər kəs bilsin, eşitsin və nəticə çıxarsın: məmurlar xalq üçün yaşayırlar, əksinə deyil. Məmur xalqın xidmətçisidir, vətəndaşa xidmət göstərməlidir, köməklik göstərməlidir, yekəxanalıq etməməlidir, hansısa qanunsuz tələb irəli sürməməlidir, özünü təvazökar aparmalıdır - özü də, ailə üzvləri də, nümunə olmalıdır, rüşvətxorluqla məşğul olmamalıdır, soyğunçuluqla məşğul olmamalıdır. Hacı Qalib Salahzadə, onun oğlu, gəlini və əqrəbası nə bilir, nə də eşitmək istəyirlər. Qalib Salahzadə mənim, qonşum Nurid Əliyevin evlərimizi talan edib, sındırıb, torpaqlarımızı zəbt edəndə deputat idi.
Bu gün onun deputat kreslosunda oğlu Əliabbas Salahzadə oturub. Mənim zəbt olunan torpağım Hacı Qalibin gəlini Xatirə Allahşükür qızının adına keçirilib. Sabunçu Rayon Məhkəməsində dəfələrlə şikayətimə baxılıb, hər dəfə də Qalib Salahzadənin və onun ailə üzvlərinin xeyrinə qətnamə çıxarılıb. Hər dəfə də yuxarı instansiyalar həmin qanunsuz qətnamələri ləğv edib. Azərbaycanın ən üst məhkəmə qurumu - Konstitusiya Məhkəməsinin əlimdə qərarı var ki, Bilgəh qəsəbəsində zəbt edilən torpaq mənim özəl mülkiyyətimdir. Amma illərdir mən öz özəl torpağıma gedə bilmirəm. Bu adamlar məhkəməni saymırlar. Hacı Qalib ötən məhkəmə prosesi zamanı Sabunçu Rayon Məhkəməsinin binasına gəlib, amma məhkəmə zalına daxil olmadı. Hakimdən səbəbini soruşdum, dedi ki, rəsmi çağırış göndərmişik, gəlməyiblər. Ona görə də hakimdən xahiş etdim ki, bu adamların məhkəmədə iştirakları təmin edilsin".
Seymur Quliyevə məxsus Bilgəh qəsəbəsində 20 sot torpaq sahəsi zəbt olunub, içindəki 2 və 3 mərtəbəli evlər talan edilib və özülünə qədər sökülüb. Bu işdə cavabdehlər Milli Məclisin deputatı Əliabbas Salahzadə, onun həyat yoldaşı Xatirə Salahzadə və atası, keçmiş deputat Qalib Salahzadədir. Ötən məhkəmə iclasına Qalib Salahzadə, oğlu Əliabbas Salahzadə, gəlini Xatirə Allahşükür qızı prosesə qatılmayıblar. Qalib Salahzadənin vəkili bunu onların məhkəməyə çağırış vərəqələrinin almamaları ilə izah edib.
Seymur Quliyev 2003-cü ildə alqı-satqı yolu ilə əldə etdiyi torpaq sahəsinin, orada tikdirdiyi evlərin zəbt olunması, sökülməsi, əlində mülkiyyət hüququnu təsdiq edən sənədlər olduğu halda, həmin ərazinin son illər avtodayanacaq kimi istifadə olunması haqda danışıb. İddiaçı bildirib ki, son 10 ildə bu problemlərlə əlaqədar dəfələrlə məhkəmə çəkişmələri olub. Əlində onun haqlı olduğunu sübut edən 13 fərqli məhkəmə qərarı var. O, vurğulayıb ki, qeyd olunan ərazidə onlar yaşadıqları halda, Xatirə Salahzadənin adına çıxarış alınıb: “Halbuki həmin vaxt 10 il idi orada biz yaşayırdıq. Əlimizdə də öz ”kupçamız" var idi. Uzun məhkəmə çəkişmələrindən sonra məhkəmədə biz haqlı olduğumuzu sübut elədik. Buna baxmayaraq, Qalib Salahzadə qoçu kimi bizi ev paltarlarımızda yaşadığımız evdən çıxartdırdı. Evlərimi sökdürdü. Evimdəki əşyaları, uşaqlarımın oyuncaqlarını, hər şeyimi daşıyıb apardılar..."
Ötən məhkəmədə Qalib Salahzadənin vəkili deyib ki, müvəkkili Daxili İşlər Nazirliyinin Baş İstintaq və Təhqiqat İdarəsində başlanmış cinayət işi üzrə istintaqa cəlb olunub. Buna görə də iddiaya baxışın dayandırılmasını istəyib. Vəkil bildirib ki, Seymur Quliyevə məxsus torpaq sahəsi iddiada göstərilən ərazidə deyil.
Seymur Quliyev isə bildirib ki, qarşı tərəf yalan danışır, onun torpaq sahəsinin koordinatları var, torpağı da Qalib Salahzadə tərəfindən qəsb olunub, torpağı üzərindəki əmlaklar varvarcasına dağıdılıb, talan edilib. Bundan sonra quru torpaq sahəsi gəlini Xatirə Allahşükür qızının adına rəsmiləşdirilib.
Seymur Quliyev bildirib ki, qarşı tərəfin yalanları alt-üst etmək üçün əlində dövlət qurumları tərəfindən kifayət qədər qanuni və əsaslı sənədlər var: “Qalib Salahzadə Hacı Məmmədova dönüb. Hacı Məmmədov hər dəfə məhkəməsində mənim şahidlərim var deyirdi, araşdıranda da məlum olurdu ki, şahid kimi adını çəkdiyi şəxs illər əvvəldən rəhmətə gedib. Hacı Qalib Salahzadə də hər dəfə mənim sənədim var deyib vaxt uzadır. Araşdıranda da məlum olur ki, sənəd saxtadır. İntəhası, Baş Prokurorluq onun saxta sənədləri ilə bağlı cinayət işi başlamaqdan yayınır. Onu rəsmən müdafiə edirlər. Üstəlik, məhkəməyə də təqdim etdiyim sənədləri it-bata salırlar. Sonuncu məhkəmədə məlum oldu ki, işin içində olduqca vacib, Hacı Qalib Salahzadənin yalanları alt-üst edən torpağın koordinatları haqda məlumat olan sənədləri iş materiallarından götürüblər. Mən iddia etmirəm ki, sənədlər Sabunçu Məhkəməsindən oğurlanıb, amma fakt bu idi ki, məhkəməyə təqdim etdiyim sənədlərin əhəmiyyətli hissəsi iş materialları arasından götürülüb. ”Bunu kim edib" sualını hakimə də verdim, cavab verə bilmədi. Mən ədliyyə naziri Fikrət Məmmədova, Sabunçu Rayon Məhkəməsinin sədri İlqar Abbasova mətbuat vasitəsi ilə rəsmi şəkildə müraciət edirəm: sənədlərin yoxa çıxarılması məsələsi araşdırılsın və açıq məhkəmə prosesində jurnalistlərin iştirakı təmin olunsun".
İddiaçı Bilgəh qəsəbəsi, keçmiş A.Salahzadə (indiki Qələbə) küçəsi, 21-ci döngədə yerləşən və ona məxsus olan 2 saylı evin və torpağının boşaldılması, dağıdılmış daşınmaz əmlakların əvvəlki vəziyyətinə qaytarılmasını, bağ sahəsinə gedən yolun açılması, torpaq üzərində olan dəmir darvazanın, şlaqbaumun, parklanma avadanlıqlarının götürülməsi vəzifəsinin cavabdehlərin üzərilərinə qoyulmasını, vurulmuş mənəvi ziyanin 2 milyon manat və maddi zərərin əvəzi kimi (manatın devalvasiyası və inflyasiya nəzərə alınmaqla) üç milyon manat cavabdehlərdən pul tutulmasını istəyir.
Habelə xüsusi mülkiyyətimdə olan evin yerləşdiyi torpaq sahəsindən dayanacaq kimi istifadə edilməsinə görə beş il ərzində əldə edilmiş 450 min manat, daşınmaz əmlaklar sökülərkən dağıdılmış daşınar əşyalara görə (stol-stullar, mebel, soyuducu, qabyuyan, kondisionerlər, televizor və digər ev eşyaları) 96 min manat təzminat istəyir.
Hakim qərarını iyulun 22-də elan edəcək.
Seymur Quliyevin şikayəti əsasında DİN-in Baş İstintaq və Təhqiqat İdarəsində CM-in 186 (özgənin əmlakını qəsdən məhv etmə və ya zədələmə), 188 (torpaq üzərində mülkiyyət, istifadə və ya icarə hüququnu pozma), 320 (rəsmi sənədləri saxtalaşdırma və ya saxta sənədlərdən istifadə etmə) və 322-ci (özbaşınalıq) maddələrilə cinayət işi başlanıb, Qalib Salahzadə dindirilib. İstintaq belə nəticəyə gəlib ki, Salahzadənin əməlində CM-in 186 və 188-ci maddələrindən başqa, 308 (vəzifə səlahiyyətlərindən sui-istifadə etmə), (vəzifə səlahiyyətlərini aşma) və 222-2 (müvafiq icazə almadan mühafizə zonalarında tikinti və ya quraşdırma işləri aparma) maddələrinin də tərkibi var. Çünki hadisələr baş verəndə Qalib Salahzadə deputat idi. Bu maddələrlə istintaq aparmaq isə prokurorluğun səlahiyyətindədir. Yaxud da prokurorluq ayrıca razılıq verməlidir ki, daxili işlər orqanlarında istintaq davam etidirilsin.
DİN-in Baş İstintaq və Təhqiqat İdarəsi həmin maddələrlə istintaqın davam etdirilməsinə razılıq almaq üçün prokurorluq qarşısında vəsatət qaldırıb, 14 may 2020-ci ildə cinayət işinin materialları Baş Prokurorluğa göndərilib. O vaxtdan da cinayət işinin icraatı dayandırılıb.
“Yeni Müsavat”
