Ölkədə iqtidarla müxalifət arasında dialoq mövzusu son vaxtlar sanki çox arxa plana keçib. Bu mövzuda nə aktiv diskussiyalar, nə də təşəbbüslər diqqət çəkir. Mövzuları təklif edən, təşəbbüsləri irəli sürən tərəf yalnız iqtidar olduğundan ondan yeni təklif gəlmədi və müzakirələr də dayandı.
Yeri gəlmişkən, qeyd edək ki, bugünlərdə AXCP funksioneri Fuad Qəhrəmanlı iqtidarı real müxalifətlə siyasi dialoqa başlamağa çağırıb. O deyib ki, ölkədə proporsional seçki sistemi bərpa olunmalı və bu əsasda növbədənkənar, mümkün qədər demokratik parlament seçkisi keçirilməli, siyasi azadlıqların önü açılmalıdır.
“Bununla müxalifətin siyasi sistemə inteqrasiyası yolunda əngəl aradan qaldırıla, yumşaq siyasi keçidin bazası yaradıla bilər. Azərbaycanla Avropa İttifaqı arasında nəzərdə tutulan strateji tərəfdaşlıq sazişi imzalanaraq ölkədəki islahatlara beynəlxalq dəstək təmin olunmalı və Avropaya inteqrasiya istiqamətində real addımlar atılmalıdır”, - deyə o bildirib.
Təmasların dayanmasına səbəb nədir? Cəmiyyəti narahat edən aktual mövzular yoxdur, yoxsa tənqidçilərin iddia etdiyi kimi, “iqtidar müxalifəti ”özü istədiyi halda" görüş üçün çağırır. Bütün təmaslar məhz iqtidara lazım olduğu halda gerçəkləşir, yoxsa müxalifət özü də tənbəlləşib, iqtidara müzakirələr üçün mövzular təklif edə bilmir və sairə... DİA.AZ "Yeni Müsavat"a istinadla xəbər verir ki, Böyük Azərbaycan Partiyasının sədri Elşad Musayev bu gün dialoq istəyənlərin vaxtilə hakimiyyətlə olan təmaslarından söz açdı: “İndiyə qədər iqtidarla müxalifət arasında lazımi səviyyədə danışıqlar olmayıb. Danışıqlar xaricilər vasitəsilə aparılıb. 90-cı illərin ikinci yarısından proseslər belə gedib. Bu da ayrı-ayrı məsələlərin müzakirəsi ilə bağlı olub. Müxtəlif sənədlər qəbul olunub. Seçki qanunvericiliyi də qəbul edilib. Özlərini radikal müxalifət adlandıran şəxslər həmin proseslərin içərisində olublar. Həmin şəxslərin zaman-zaman hakimiyyətlə müəyyən danışıqları olub. Müəyyən qədər istəkləri yerinə yetirilib. Həmin qüvvələr bir növ çalışıblar ki, müxalifəti inhisarda saxlasınlar. Xarici dairələr vasitəsilə hakimiyyətlə danışıb istəklərini alanlar bu gün özlərini real müxalifət kimi təqdim edirlər.
Daha çox xaricilərin ”uşağı" qismində çıxış ediblər. Təzyiqlər yolu ilə nəsə götürməyə çalışıblar. Zaman keçdikcə digər siyasi təşkilatlar da ortaya çıxdı. Sonradan göründü ki, ölkədə daha rasional düşünən siyasi qüvvələr də var. Ölkədə dinc şəkildə qarşıdurma olmadan da prosesləri idarə etmək reallığı üzə çıxdı. Bunun üçün hakimiyyətlə dialoq lazımdır. İqtidar nə qədər radikal, sərt olsa da, reallığı qiymətləndirmək lazımdır. Ölkənin mənafeyi üçün danışıqlar olmalıdır. Gedib düşmənlərimizlə danışırıq, niyə də iqtidarla danışmayaq? Onun üçün də bir sıra təşkilatlar dialoq təklifi ilə çıxış etdi. Son iki ildə hakimiyyət tərəfindən bu istiqamətdə müəyyən qədər addımlar atıldı. Onu da bildirək ki, iqtidar daxilində bu dialoqun əleyhinə olanlar var idi. Ramiz Mehdiyevin sərt xətti var idi. Bildiyiniz kimi, son illərdə münasibətlər xeyli dərəcədə yüngülləşdi. Söhbət ondan gedir ki, Azərbaycanda 1-2 siyasi təşkilat var, deyirlər ki, danışıqları bizimlə aparın. Həmin radikal xəttin əsas arzusu bu idi. Çünki onlar öyrəşiblər. Zaman-zaman deputat yerləri alıblar, başqa istəkləri yerinə yetirilib. İqtidarla bu qüvvələr arasında münasibətlərin pozulmasına səbəb odur ki, iqtidara “atıblar”. Hakimiyyət də onları sərt şəkildə cəzalandırıb. İndi dialoq təşəbbüsü ilə çıxış edirlər. Məsələlərin geniş müstəvidə həllini istəyirlərsə, biz bunun əleyhinə deyilik. Nəhayətdə ölkədə danışıqları dinc surətdə həyata keçirməliyik. Hakimiyyət də dialoq adı altında imitasiya xarakterli davranışlar sərgiləməməlidir. Burada söhbət real danışıqlardan gedir. Eyni zamanda nəhayət, müxalifət də üzünü ölkə daxilinə tutmalıdır".
Partiya sədri iqtidarla müxalifət arasında təmasların dayandığı yönündə deyilənlərlə razılaşmır: “Bilirsiniz ki, ölkədə pandemiya şəraitidir. İstəyirdik ki, hakimiyyət nümayəndələri ilə müxalifət təmsilçiləri arasında görüşlər keçirilsin. Bu görüşlərdə açıq şəkildə olsun, yəni bağlı qapılar arxasında olmasın. Hakimiyyətə də istəklərimizi demişdik. II Qarabağ savaşı başlayandan 2-3 gün keçmiş hakimiyyətlə siyasi partiyalar arasında zoom üzərindən görüş keçirildi. Ondan sonra biz istəyirdik ki, siyasi təşkilatlarla ölkə prezidenti arasında bir görüş baş tutsun. Biz nəhayətdə bir araya gəlməyi bacarmalıyıq. Təəssüflər olsun ki, hazırda Azərbaycanda sosial şəbəkələr daha çox qaragüruh, radikal qüvvələrin nəzarəti altındadır. Səhərdən axşama qədər kin, nifrət bəsləyirlər, şər-böhtan yağdırırlar. Adamların 50-70 yaşları var, iş-gücləri digər siyasi qüvvələri gözdən salmaqdır. Siz necə dialoqdan danışırsız ki, öz olduğunuz düşərgədə digərlərinə nifrət bəsləyirsiz, onlara şər-böhtan yağdırırsız? Azərbaycanın bu radikal müxalifət qanadının nəzarətində olan şəbəkələr var. Biz heç siyasi təşkilatlarla dialoq apara bilmirik, o da qala iqtidarla. Daha ağıllı, rasional düşünən qüvvələrin üzərinə ”səlib yürüşü" təşkil olunur. Kimsə indi sonradan dialoqa getmək istəyirsə, getsin. Onlara nəsə deyən yoxdur. Amma sosial şəbəkələrdə bu təhqirlərə son verilməlidir. Bunlar hamını söyürlər. Hamını söyənlərlə də necə dialoqa getmək olar?"
ALDP rəhbəri Fuad Əliyev deyilənlərlə razı deyil: “Ölkədə iqtidarla müxalifət arasında dialoq mövzusu son vaxtlar sanki çox arxa plana keçib” fikirləri ilə razı deyiləm. Başqalarını deyə bilmərəm, amma ALDP olaraq biz dialoqu davam etdiririk. Demək olar ki, ölkədə gedən bütün prosesləri, vətəndaşları narahat edən problemləri mütəmadi olaraq müzakirə edirik və öz tərəfimizdən təkliflər veririk. Pandemiyanı nəzərə alaraq bu müzakirələrin əksəriyyəti onlayn olub. Ola bilər ki, bəzi partiyalar müzakirələr etmək üçün bir mövzu tapa bilmirlər və iqtidar tərəfindən təkliflər gözləyirlər. Bu da həmin partiya sədrlərinin siyasətdə təsadüfi olduqlarının bir sübutudur. Kimlərsə iqtidar-müxalifət dialoqundan kənarda qalıbsa, bu onların problemidir".
