“Azərbaycanla Ermənistan arasında sülh müqaviləsi imzalanmadan Trump Beynəlxalq Sülh və Firavanlıq Yolu (Zəngəzur dəhlizi) açılıb-açılamayacağını dəqiq deyə bilmərik. Məncə, bu, Azərbaycandan asılıdır. Azərbaycan və onun rəhbərliyi həmin dəhlizin açılmasına açıq-aşkar həvəs göstərir. Buna görə də, Azərbaycan təbii olaraq, Ermənistandan tələb edib ki, o, konstitusiyasına dəyişiklik edərək aydın və birmənalı şəkildə göstərsin ki, artıq Azərbaycanın ərazi bütövlüyünə heç bir iddiası yoxdur”.

Bu fikirləri Bizim.Media-ya danışan Ceymstaun Fondunun İdarə Heyətinin üzvü, ABŞ-ın Azərbaycandakı sabiq səfiri Metyu Brayza bildirib.

Azərbaycanla Ermənistan arasında sülh müqaviləsi, Zəngəzur dəhlizinin (TRİPP) sülh müqaviləsindən öncə açılma ehtimalları barədə danışan sabiq səfir, konstitutsiya dəyişikliklərinin zaman aparacağını, buna görə də, Zəngəzur dəhlizinin (TRİPP) sülh müqaviləsindən öncə açıla biləcəyini də istisna etməyib:

“Sülh müqaviləsinin imzalanması və ya konstitusiyanın dəyişdirilməsi müəyyən vaxt tələb edə bilər. Ona görə də Azərbaycanın hökumətindən asılıdır ki, bu prosesi necə idarə edəcək? Bir tərəfdən Zəngəzur dəhlizini mümkün qədər tez açmaq istəyi, digər tərəfdən isə Ermənistanın konstitusiyasını dəyişməsi üçün lazım olan praktik siyasi zaman. Amma Zəngəzur dəhlizi (TRİPP) açılarsa, onun böyük perspektivləri var”.

Kommunikasiyaların açılmasının iqtisadi dividendləri

Analitik əlavə edib ki, layihə yalnız Xəzər dənizindən başlayaraq Azərbaycan və Ermənistan vasitəsilə Türkiyəyə qədər uzanan yeni tranzit dəhlizi yaratmaqla kifayətlənməyəcək, həm də Ermənistana öz iqtisadiyyatını inkişaf etdirmək, sərmayə cəlb etmək və dəhliz boyunca yerləşən bütün ölkələrə məlumat texnologiyaları, bərpa olunan enerji, neft-qaz və yük daşımaları vasitəsilə fayda gətirmək imkanı yaradacaq.

“Bundan əlavə, bu, bütün regiona, o cümlədən Gürcüstandan keçən mövcud dəhlizə də kömək edəcək, çünki ümumilikdə Cənubi Qafqaz üzərindən şərq-qərb tranzit marşrutuna maraq əhəmiyyətli dərəcədə artacaq. Məncə, hamı bu prosesdən faydalana bilər. Lakin sizin də qeyd etdiyiniz kimi, hələ də Azərbaycanın baxış bucağından Ermənistanın konstitusiyasını dəyişməsi zəruridir. Bundan sonra isə mart ayında yekunlaşdırılmış və avqustun əvvəlində Vaşinqtonda Prezident Trampın iştirakı ilə Azərbaycan və Ermənistanın xarici işlər nazirləri tərəfindən paraflanmış sülh müqaviləsinin imzalanmasına yol açılacaq”, - deyə M.Brayza əlavə edib.