“Biz şəhidlərimizin xatirəsini əbədiləşdirmək üçün bulaq tikdik. Amma indi İcra Hakimiyyəti şəhidlərin yalnız adlarını yazmağa icazə verir, şəkillərini isə yerləşdirməyə imkan vermir”.
Bu sözləri Yeniavaz.com-a müraciət edənLerik rayon Şinəbənd kənd sakini Teymur Maşıyev deyib.
O bildirir ki, sözügedən bulağı kənd sakinləri öz vəsaitləri hesabına tikiblər və sentyabrın 27-si, Anım Günündə istifadəyə verilməsi planlaşdırılır:
“Lakin İcra Hakimiyyəti bulaqda şəhidlərin şəkillərinin vurulmasına icazə verməyib. İcra hakimiyyətinin nümayəndələri bildirdilər ki, şəhidlərin adlarını yazmaq olar, amma şəkilləri yerləşdirilməməlidir. Bu qərar kənd sakinləri arasında narazılığa səbəb olub. Sakinlər bildirirlər ki, onlar bütün tikintini öz hesablarına həyata keçiriblər və heç bir maddi dəstək tələb etməyiblər. Onların yeganə təsəlli mənbəyi isə şəhidlərin xatirəsini əbədiləşdirmək olub”.
Teymur Maşıyevin sözlərinə görə, onun ailəsində 4 şəhid var: Nemət Maşıyev, Natiq Kişiyev, Əfsər Talıbov və Sərxan Bəşirov.


Məsələ ilə bağlı, Lerik Rayon İcra Hakimiyyətinin İctimai siyasi və humanitar məsələlər şöbəsinin müdiri Arzu Vəliməmmədova Yeniavaz.com-a bildirib ki, şəhidlərin şəkillərinin bulağa vurulması üçün müvafiq qurumdan icazə alınmalıdır:
“Şəhidlərin yaxınlarına və kənd camaatına izah olunub ki, şəhidlərin şəkillərinin yerləşdirilməsi üçün mütləq müvafiq orqana – Mədəniyyət Nazirliyinə müraciət olunmalıdır. Lakin sənədləşmə prossesində bəzi problemlər yaşanıb. Sənədlər və eskizlər əvvəlcə rayon İcra Hakimiyyətinə təqdim edilməli, sonra isə müvafiq quruma göndərilməlidir. Müvafiq qurum razılıq verdikdən sonra şəkillər bulağa yapışdırıla bilər”.