"Berliner Zeitung" nəşri yazıb ki, ABŞ-ın Venesuelaya endirdiyi hərbi zərbə Kiyev üçün narahatedici siqnal kimi qəbul olunub. Nəşrin yazdığına görə, Kiyevdə ABŞ-ın prioritetlərinin dəyişməsi və Ukrayna istiqamətinə marağın zəifləməsi ilə bağlı narahatlıqlar artır.
"DİA-AZ" xəbər verir ki, bu məqamı siyasi ekspert Elxan Şahinoğlu ilginc məqamlarla əsaslandırıb: "Fikrimcə, Ukrayna Prezidenti Volodimir Zelenski əksinə ABŞ-ın Ukrayna istiqamətinin zəifləməsindən narahat deyil. ABŞ Prezidenti Donald Tramp Ukrayna mövzusuna maraq göstərməklə Kiyevə nə fayda verib ki? Trampı Ukraynanın ərazi itkisi düşündürmür, onun əsas məqsədi müharibəni hətta Donbasın tamamının Rusiyaya təhvil verməsi hesabına olsa belə dayandırmaqdır. Zelenski ona görə Trampla görüşlərə gedir ki, dəvətlərə mənfi cavab versə, ABŞ Prezidenti ilə münasibətləri gərginləşdirəcək. O sadəcə Trampla hər dəfə görüşməyə və Vaşinqtonun təkliflərini müzakirə etməyə hazır olduğunu söyləməyə məcburdur. Zelenskiyə Trampla növbəti qarşıdurma lazım deyil. Ukraynaya ABŞ-ın silahları və hərbi texnikası lazımdır, onu da Avropa üzərindən alır. ABŞ hərbi texnikanı Avropa ölkələrinə satır, onlar da həmin texnikanı Ukraynaya ötürürlər..."
