2020-ci ildə Vətən müharibəsi zamanı döyüşlərdə baş nahiyəsindən güllə yarası alaraq, II qrup əlil olmuş Y.Abbaslı dövlət tərəfindən ona avtomobil verilməsi üçün müraciət edib. Lakin Dövlət Tibbi Sosial-Ekspertiza və Reabilitasiya Agentliyindən ona rədd cavabı verilib.

Bizimyol.info xəbər verir ki, Qarabağ qazisi ona verilmiş imtina ilə əlaqədar məhkəməyə üz tutub. O, bir ildən çoxdur ki, bu məsələ ilə əlaqədar məhkəmələrdədir.

Ötən il Bakı İnzibati Məhkəməsində onun xeyrinə qərar çıxarılıb. Hakim belə nəticəyə gəlib ki, Dövlət Tibbi Sosial-Ekspertiza və Reabilitasiya Agentliyinin Qarabağ qazisinə verdiyi rədd cavabı qanunsuz və əsassızdır. Bu səbəbdən də onun adına minik avtomobilinin təyinatına tibbi göstəriş verilməsi öhdəliyinin Agentliyin üzərinə qoyulması qərara alınıb.

Bu qərarla Dövlət Tibbi Sosial-Ekspertiza və Reabilitasiya Agentliyi razılaşmayıb və apellyasiya şikayəti verib. Lakin Bakı Apellyasiya Məhkəməsi də Qarabağ qazisini haqlı hesab edərək, aşağı instansiyanın qərarını qüvvədə saxlayıb. Müharibə əlilinə avtomobili vermək istəməyən Agentlik bu dəfə Ali Məhkəməyə şikayət edib. Ali Məhkəmədə istədiyinə nail olub – qərar ləğv edilib və məsələ yenidən araşdırılması üçün iş yenidən Bakı Apellyasiya Məhkəməsinə qaytarılıb: “Bir neçə gün əvvəl Bakı Apellyasiya Məhkəməsində hakim Nigar Nəbizadənin sədrliyilə baxıldı. Bu dəfə apellyasiya məhkəməsi Dövlət Tibbi Sosial-Ekspertiza və Reabilitasiya Agentliyinin xeyrinə qərar çıxardı. Əvvəl təmin olunmuş qərar ləğv edildi”.

Bu dəfə Qarabağ qazisi Ali Məhkəməyə şikayət etmək niyyətindədir. O, hesab edir ki, rədd cavabı əsassız olmaqla, hüquqlarının məhdudlaşdırılmasına səbəb olub.

Dövlət Tibbi Sosial-Ekspertiza və Reabilitasiya Agentliyi imtinasını belə əsaslandırıb ki, avtomobil Nazirlər Kabinetinin “Əlilliyin qiymətləndirilməsi Qaydası”nın 1.5-ci bəndinə əsasən, xüsusi səbəblə, habelə Çemobıl AES-də qəzanın ləğvi ilə əlaqədar əlilliyi müəyyən olunmuş şəxslərə verilir: “Şikayətçinin diaqnozu həmin siyahıda olmadığı üçün ona imtina verilib”.