Lazımi preparatlarla təmin edilmədiyindən, Naxçıvandakı xəstəxanalarda böhranlı vəziyyət yaranıb. Artıq, tibb müəsssisələrində ağrıkəsici iynə-dərmanlar, spirt və təcili yardım üçün lazım olan digər preparatları tapmaq da müşkülə çevrilib. Bu haqda “Gündəlik Naxçıvan”a bir qrup tibb işçisi məlumat verib. Onlar bildirirlər ki, çatışmamazlıqlar səbəbindən ağır xəstələri belə, resept yazıb, evə göndərirlər.

Xəstəxanada yatıb, müalicə almaqda israr edənlərə isə, öz xərci hesabına müalicə olunmaq şərti qoyulur.

Naxçıvan Mərkəzi Xəstəxanasının adının çəkilməsini istəməyən əməkdaşı deyir ki, desifeksiya üçün spirt tapılmadığından, tibbi heyət sudan istifadə edir:

“Təsəvvür edin ki, adi spirti də satıb, ciblərinə qoyurlar. Nazirlikdən bizə deyirlər ki, spirt şüşələrinə su doldurun, xəstələr elə bilsin spirtdir. Biz də məcbur olub, xəstələri aldadırıq. Maliyyə çatışmamazlığı deyib, xəstəxanaya heç nə vermirlər. Adi ağrıkəsici, spir, şpris belə vermirlər. Preparatlar çatışmadığından xəsətə yatırtmırıq. Xəstələr iynədən, şpritsdən tutmuş hər şeyi özləri almalıdır. Yalnız bu zaman saxlayırıq.

Əvvəllər də çatışmazlıqlar olurdu. Ancaq, heç vaxt bu səviyyəyə çatmamışdı. Nariz Samiq Sadıxov gələndən vəziyyət daha da bərbad olub. Bu nə qədər davam edəcək? Şikayətlənən də də işdən çıxarmaqla hədələyirlər.”

Həmin xəstəxanada bir həftə müalicə almış N. Kərimov bütün xərcləri özünün çəkdiyini bildirir:

“Əməliyyat olunduğum üçün bir neçə gün xəstəxanada yatmalı oldum. Gördüklərimdən dəhşətə gəldim. Dövlət xəstəxanasında dövlət adına bir şey yoxdur. Əvvəlcədən resept yazıb dərmanlarımı qohumlarıma aldırdılar. Ağrıkəsici istəyəndə deyirlər nayirlik vermir, yoxdur, özün almalısan.

Təsəvvür edin ki, iynə vurmaq üçün spirti özümə aldırdılar. Bəs, dövlətin xəstəxanalara hər il ayırdığı vəsait hara gedir? İmkanı olmayanlar nə etsin, necə müalicə olsun?”