Dünən Naxçıvan MR Ali Məhkəməsində etirazçı müəllim Səriyyə Qəmbərovanın şikayəti əsasında proses baş tutub. Müəllimin şikayəti onun qanunsuz işdən çıxarılmasına haqq qazandıran Naxçıvan şəhər Məhkəməsinin qərarından idi. Ali Məhkəmə də şəhər məhkəməsinin qərarını haqlı sayaraq, qüvvədə saxlayıb.

Bu haqda “Gündəlik Naxçıvan“a Səriyyə Qəmbərovanın özü məlumat verib:

“Az da olsa ümidim var idi ki, Ali Məhkəmə ədalətli qərar çıxaracaq. Lakin, bu baş vermədi. Hakim Mehman Allahverdiyev də mənim qanunsuz işdən çıxarılmamı dəstəklədi. Məktəbdəki rüşvətxorluq və digər pozuntuları ictimailəşdirdiyim üşün əni direktor Asudə Məmmədova məni qanunsuz işdən çıxarmışdı. Naxçıvan şəhər Məhkəməsinin baş hakimi Gülnar Səfərəliyeva yerli Təhsil Nazirliyinin sifarişi ilə mənim şikayətimi rədd etdi, indi də Ali Məhkəmə.”

Səriyyə Qəmbərova bildirir ki, sona kimi mübarizə aparacaq:

“Mən susmayacağam. Yerli Ali Məhkəmənin qərarından kassasiya şikayəti verəcəyəm. Ümid edirəm ki, burdakıların əli Bakıya çatmayacaq. Orda da ədalətsiz qərar çıxarılsa, Avropa İnsan Haqları Məhkəməsinə müraciət edəcəyəm.”

Səriyyə Qənbərova ötən ilin oktyabrına qədər Naxçıvan şəhər 1 saylı tam orta məktəbində fiziki tərbiyə müəllimi işləyib. Buradakı korrupsiya və digər qanun pozuntularını ictimailəşdirdikdən sonra öncə məktəbdə döyülüb, daha sonra isə işdən qovulub. Daha sonra məktəb direktoru müəllimin onu döyməsi iddiası ilə məhkəməyə şikayət edib. Sosial şəbəklərdə yayılan videolarda isə, direktorun göstərişi ilə müəllimin döyüldüyü görünür. O, həm döyülməsi və işdən qanunsuz çıxarılması ilə bağlı məhkəməyə şikayət etmişdi.