“Televiziya və radiolara müraciət etmişəm ki, məni tez-tez dəvət etməsinlər. Lazım olan vaxtlarda məni dəvət etsinlər. Mən xalqa vətənpərvər ruhda mahnılar oxuyanda lazımam. Sənətkar savadlı olmalıdır. Muğamlarımızı bilməlidir. Savadlı olsan irəli gedəcəksən, tanınacaqsan. Səhnə danışığı, qabiliyyət yerli-yerində olmalıdır. Sənətkar öz sənətini mükəmməl biləndə, notdan başı çıxanda o hər kəsin hörmətini qazanır”.
Bunu Moderator.az-a açıqlamasında xalq artisti Bilal Əliyev deyib. O daha sonra bir müddət əvvəl toylara baha qiymətə getdiyini etiraf edib:
“Maddi cəhətdən imkanlarım yaxşı olduğuna görə risk edib dedim ki, mən 100 minə toya gedəcəm. Bu da məndə alındı. O qiymətə toya getdim. Həmin qiymətə məni çox toylara dəvət etdilər. Təbii ki, söhbət əvvəlki illərdən gedir. İndidən yox. Pandemiyadan sonra toylar ümumiyyətlə dəyişdi” deyə o bildirib.
Xalq artisti Muğam müsabiqəsində yaşanan qalmaqaldan da danışıb:
“Şəxsən mənim özümü münsif kimi çox yerlərə dəvət ediblər, imtina etmişəm. Ona görə ki, düşünmüşəm kimsə oyun oynayar, xalqın gözündən düşərəm. Vəzifə də, münsif olmaq da qorxuludur. Sənətkarı gözdən sala bilərlər. Ona görə də mən heç bir təklifi qəbul etmədim. Müsabiqədə kim haqlıdır, kim haqsızdır onu Allah bilir” deyə sənətkar bildirib.
