“Azərbaycanda aktyor və aktrisa sənətinin nümayəndələri yetəri qədər var. Elə onlardan xalq artistləri Şəfiqə Məmmədova və Elmira Şabanovanın adını misal çəkə bilərəm. O ki, qaldı onların bu gün çəkilməməsinə səbəb.. Elmira xanım xəstədir, gözləri zəifləyib. Şəfiqə xanım istəsəydi bu dəqiqə 100 filmə çəkilərdi, özü bilərəkdən çəkilmir”

Bunu Moderator.az-a açıqlamasında Əməkdar İncəsənət xadimi, kinoşünas Aydın Kazımzadə deyib. O daha sonra bildirib ki, Şəfiqə Məmmədova məxsusi senari istəyir:

“Şəfiqə xanımla dəfələrlə söhbət etmişəm. Deyir ki, əgər ürəyimə yatan bir ana obrazı yazılsa və bu ssenari mənə aid olsa böyük məmnuniyyətlə çəkilərəm. Onu da yazan yoxdur. Çünki senaristlər də bizdə laxlayır. İndi həlləm-qəlləm senaristlər çoxalıb. Şəfiqə xanım hər filmə çəkilmək istəmir. Əlbəttə ki, onun üçün senarilər yazılmalıdır. Bu dəqiqə elə bir senari və film yoxdur ki, Şəfiqə çəkilsin” deyə o bildirib.

Aydın Kazımzadə bildirib ki, artıq heç bir sənətçinin rolunu dərindən tənqid etmir:

“Çalışıram ki, heç kimin xətrinə dəyməyim. Ona görə də çox dərinə getmirəm. İstəmirəm mənimlə düşmən olsunlar. Onsuz da o bu günə qədər o belə oynayıbsa, mən onu dəyişdirə bilmərəm ki” deyə tənqidçi bildirib.

Aydın Kazımzadə Ayaz Salayevin üslubundan da danışıb:

“Ayaz Salayev bir film çəkdi. O ekranlara çıxmadı. Orada elə erotik səhnələr var idi ki, efirə buraxmaq olmazdı. Onun filmlərində erotik səhnələrə çox yer verilir. “Yarasa” filmini misal çəkə bilərəm. Çox böyük və mənalı filmdir. Azərbaycan kinosuna yenilik gətirib. Söhbət orada açıq-saçıqlıqdan yox, problemin qoyuluşu və həllindən gedir. Ona görə də film dünyanın bir çox nüfuzlu festivallarında nümayiş olundu. Sənət ayrı şeydir, erotika ayrı. Ayaz Salayev burada erotikanı sənət kimi göstərib. İndi o da elə görür də. Ayaz Salayevin öz yozumu və baxışı var” deyə o bildirib.