Milli Televiziya və Radio Şurasının videoformatda iclası keçirilib. İclasda işğaldan azad olunmuş ərazilərdə radio yayımın təşkili məsələləri müzakirə olunub. İşğaldan azad olunmuş ərazilərdə yeni yayım tezliklərinin istifadəyə verilməsi ilə əlaqədar Şuşa şəhərində yerləşən Radio Televiziya Yayım Stansiyası (RTYS) vasitəsilə ümumölkə radio kanallarının (“Xəzər” radiosu, “Azad Azərbaycan” radiosu, “100.5 FM - Fərqli radio”, “Avto FM” radiosu, “Araz” radiosu, “Space” radiosu, “Radio Antenn”, “Media FM” radiosu) Dağlıq Qarabağ və ətraf ərazilərdə yayımının təşkil olunması barədə qərar qəbul edilib.
İclasda həmçinin, Dağlıq Qarabağ və ətraf ərazilər yeni regional radio kanalının açılması üçün 102,7 MHs işçi tezliyinə 10 fevral 2021-ci il tarixdən 12 mart 2021-ci il tarixədək müsabiqə elan edilib.
Vurğulandığı kimi, Dağlıq Qarabağ və ətraf ərazilərdə yeni regional radio kanalı açılacaq. Təbii ki, bu gün regional radio və televiziya kanallarının işğaldan azad olunmuş ərazilərdə açılmasının çox böyük siyasi və tarixi əhəmiyyəti vardır. Başlıcası olaraq, bu regional radio kanalının Azərbaycan həqiqətlərinin dünyaya çatdırılmasında çox böyük əhəmiyyəti ola bilər. Ümumiyyətlə, qeyd edək ki, cəmiyyətin idarə olunmasında ən sərfəli vasitə kimi qəbul olunan "kağızsız və məsafəsiz qəzet" - teleradio bu gün həyatımızın bir parçasına çevrilib. Xüsusilə Azərbaycan ədəbiyyatının və incəsənətinin inkişafında, ədəbi dilin təkmilləşdirilməsində, nitq mədəniyyətinin formalaşdırılmasında radionun xidmətləri danılmazdır. Radio zaman-zaman çoxmilyonlu Azərbaycan xalqına ümid, inam, sevinc və təsəlli olub. Hətta II Dünya müharibəsinin ən çətin günlərində Azərbaycan əsgərinin mərdliyindən, mübarizliyindən, qətiyyətindən, hünərindən məhz Azərbaycan radiosu söhbət açıb. O illərdə radio müsəlləh əsgər olub. Həm gecə, həm gündüz ayıq-sayıq dayanıb.
"Yuxu" nədir bilməyib. Həqiqətlərin yayılmasında çox mühüm rol oynayıb. Ümumiyyətlə, radio yarandığı gündən bəri öz fərdi xüsusiyyətlərinə görə bütün kütləvi informasiya vasitələrindən fərqlənib. Çünki radioya hər yerdə - dağda, bağda, düzdə, aranda, maşında, yolda - bir sözlə, hər məkanda qulaq asmaq mümkündür. Ona görə də bir sıra inkişaf etmiş ölkələrdə ictimai-siyasi xarakterli, dövlət əhəmiyyətli ən mühüm xəbərlər ilkin olaraq məhz radio ilə xalqa çatdırılır. Bu fakt uzun illər Azərbaycan radiosunun təcrübəsində də özünü təsdiqləyib. Xatırladaq ki, Azərbaycan radiosu da Vətənin ən ağır günlərində Azərbaycanın ucalan səsi, fəryadı, naləsi olub. Vaxtilə Azərbaycan radiosu itirilən yurd yerlərinin ağrısını yaşayıb. Qeyd edək ki, 1988-ci ildə başlanan Dağlıq Qarabağ münaqişəsi zamanı radio Azərbaycan xalqının maraqlarından çıxış etdi. Bu, 1990-cı ilin yanvarında özünü daha da qabarıq şəkildə göstərdi. Sovet imperiyası təkcə xalqı deyil, həm də Azərbaycan radiosunu susdurmağa cəhd edirdi. Mənbələrdə yazılır:" ...Televiziyanın enerji blokunu partladıb sıradan çıxarmaqla yanaşı, radionun əməkdaşları da efirdən uzaqlaşdırılır. Radioda hərbi senzor fəaliyyət göstərirdi. Matəm içində olan ölkəmizə komendantın həqiqətdən tamamilə uzaq, iftira dolu məlumatlar ötürülürdü. Lakin həmin faciəli günlərdə Azərbaycan radiosunun xaricə yayım redaksiyası 20 Yanvar faciəsinin baş verməsini bütün təfərrüatı ilə dünyaya çatdıra bildi".
Dövlət müstəqilliyinin əldə edilməsi radionun qarşısında duran vəzifələri kökündən dəyişdirdi. Radioda cəmiyyətlə sıx və açıq ünsiyyətə girmək meyillərini gücləndirən proqramlara üstünlük verildi. Qarabağ uğrunda erməni işğalçılarına qarşı savaşın başlanılması ilə radio hər gün Müdafiə Nazirliyinin məlumatlarını yayırdı. Dinləyicilərdə vətənpərvər hissləri gücləndirən "Açıq-aşkar", "Xudafərin", "Sözün düzü", "Baxış bucağı", "Dünya", "Pillə", "Çevrə", "Radio-atmaca", "Molla Nəsrəddin", "Yol", "Yuva", "Vaxt", "Dan yeri" kimi verilişlər hazırlanır, hərbi marşlar səsləndirilirdi. İndi isə radiolarımız Azərbaycanın işğaldan azad olunmuş Qarabağ torpaqlarımızdan bizlərə səslənəcək. Necə ki, Ulu Öndər Heydər Əliyevin hakimiyyətə qayıdışını Azərbaycan xalqına çatdırdı.
Xatırladaq ki, Azərbaycan Televiziyası radionun yaranmasından 30 il sonra – 1956-cı il fevralın 14-də fəaliyyətə başlayıb. Həmin dövrdə Azərbaycanda televiziyanın fəaliyyət göstərməsi nadir hadisə sayılsa da, Dövlət Televiziyası Azərbaycanda yeganə TV deyildi. Bölgə televiziyası olaraq, Şuşa televiziyası da fəaliyyət göstərirdi. 1961-ci ildə Gəncədə, Göyçayda və Şuşada güclü televiziya stansiyalarının işə düşməsi Bakıdan yayılan verilişləri Xanlar, Goranboy, Yevlax, Mingəçevir, Ağcabədi və Dağlıq Qarabağda maneəsiz qəbul etməyə imkan verirdi. Hətta 20 Yanvar faciəsi zamanı hamı AzTV-nin dağıdılması xəbərini Şuşa Televiziyasından almışdı. Bu günləri yenicə işğaldan azad olunmuş Dağlıq Qarabağ torpaqlarımızda regional radio kanalının açılması həm sevincli, həm də qürurvericidir.
Tanınmış media nümayəndələri Dağlıq Qarabağ və ətraf ərazilərdə yeni regional radio kanalının açılmasını yüksək dəyərləndiriblər və öz təkliflərini veriblər.
"Xalq Cəbhəsi" qəzetinin baş redaktoru Elçin Mirzəbəyli "Şərq"ə açıqlamasında bildirib ki, işğaldan azad edilmiş ərazilərimizdə radio və televiziyanın, həmçinin regional radionun açılmasına çox böyük ehtiyac var idi. E.Mirzəbəyli vurğulayıb ki, açılacaq radio kanallarının sayı çox azdır, hətta 2-3 ola bilər:
"Alternativlər mütləq olmalıdır. Söhbət həm də orada yaşayan ermənilər üçün alternativlərdən gedir. Yəni yayım olaraq həm Azərbaycan, həm də erməni dillərində verilişlərin yayılmasına ehtiyac var. İlk növbədə erməni dilli əhalinin diqqətini Azərbaycanın informasiya məkanına yönəltməliyik ki, onlar Ermənistanın qismən də olsa informasiya məkanından qopsunlar. Bu, bizim üçün vacib amillərdəndir. Təbii ki, radionun və telekanalların yaradılması üçün komponentlər nəzərə alınmalıdır. Əvvəla, ortalığa keyfiyyətli bir iş qoyulmalıdır".
Media təmsilçisi əlavə edib ki, orada fəaliyyət göstərəcək insanlar da kifayət qədər peşəkar olmalıdırlar: "Hər sözün ölçülüb-biçilməsinə ehtiyac var. Daha analitik, daha uzaqgörən, daha strateji hədəflərə hesablanmış proqramların hazırlanması vacibdir. Mənim qənaətimə görə, bunlar effektiv nəticələrə gətirib çıxara bilər".
Əməkdar jurnalist Natiq Məmmədli "Şərq"ə açıqlamasında qeyd edib ki, Qarabağda radio nümunəsində media təsisatının yaradılması ideyasını birmənalı alqışlamaq lazımdır. N.Məmmədli əlavə edib ki, Birinci Qarabağ müharibəsinə kimi o regionda Şuşa televiziyası da daxil olmaqla bölgə mətbuatı da çox yaxşı inkişaf etmişdi:
"İndi o ənənələri bərpa eləmək zamanın tələbidir. Radiodan sonra yəqin yerli telekanalın yaradılmasını müzakirə eləmək lazım gələcək. Mən istərdim Şuşada yerləşən Qarabağ media evi kimi bir qurum olsun. Mərkəzi mətbuatın müxbir məntəqələri ilə yanaşı region mətbuatının da inkişafına fikir vermək lazımdır. Qarabağ mediası tək Azərbaycan dilində yox, erməni və rus dillərində də yüksək səviyyədə fəaliyyət göstərməlidir ki, qarşı tərəfin regionun simasının necə dəyişməsindən, Azərbaycanın Qarabağa sülh və əmin-amanlıq gətirməsindən xəbəri olsun. İnanıram ki, bu istiqamətdə lazımi addımlar atılacaq".
Tanınmış diktor Eldost Bayramov "Şərq"ə açıqlamasında vurğulayıb ki, Dağlıq Qarabağ ərazisində ilk olaraq radio, televiziya və mətbuat orqanlarımızın olması labüddür. E.Bayramov qeyd edib ki, ən əsası da radionun birinci növbədə olması xüsusilə əhəmiyyətlidir: "Texnologiyaların sürətlə inkişaf etdiyi bir dövrdə Dağlıq Qarabağ torpaqlarımızda mətbuat orqanlarının olması çox mühümdür. Qeyd edim ki, Sovet vaxtında böyük şəhər və rayonlarımız daxilində də region radiolar fəaliyyət göstərirdi. Məsələn, mən özüm Qax radiosunda çıxış eləmişəm. Amma bu, tamamilə başqa bir şeydir. Təbii ki, bu, ilk növbədə Qarabağın Azərbaycan torpağı olmasının təsdiqidir. Buna görə də, dərhal müharibənin ardınca orada radionun olması çox vacib idi. Hesab edirəm ki, bu baxımdan hər şey vaxtındadır və düzgündür. Fikrimcə, burada birinci növbədə dövlətin siyasətini və xalqın mədəniyyətini, folklorunu təbliğ eləmək çox mühümdür. Müxtəlif dillər məsələsinə gəlincə, bu dillərdə verilişlərin yayımlanması dövlətin işidir. Qeyd edim ki, bu günləri ölkəmizdə yaşayan azsaylı xalqların dillərində neçə illərdir ki, radiomuz fəaliyyət göstərir. Neçə illərdir ki, erməni, rus, ləzgi, tat, fars dillərində işləyirlər".
"İdman" TV və Azərbaycan Radiosunun ortaq yayımında "Extra time" verilişinin aparıcısı İlkin Baba bildirib ki, bu xəbərə ən çox sevinən insanlardan biridir:
"Qarabağın səsi olacaq bu radionun fəaliyyətə başlamasını səbirsizliklə gözləyirəm. Ümid edirəm ki, yeni açılacaq regional radio reytinq üçün çalışmayacaq. Əksinə, öz dədə-baba yurduna qayıdacaq insanların qulaq yoldaşı, evində eşidiləcək doğma səsə çevriləcək. Qarabağa həyat qayıdır. Bu qayıdışı ən kiçik detalları ilə dinləyiciyə çatdırmaq öhdəliyi yerinə yetirilməlidir. Hər şeydən vacib məqam isə həmin radionun Qarabağdan səslənməsidir. Təsəvvürü belə insana qürur verir: "Şuşadan səslənirik"..."
