Sədərək rayonunda sürətli internetə rüşvət vermədən qoşulmaq mümkün deyil. Sakinlərin “Gündəlik Naxçıvan”a bildirdiklərinə görə, bundan əlavə onlardan çəkiliş, təmir üçün də əlavə rüşvət alınır.

Sakinlər qeyd edirlər ki, rayonda alternativ internet operatoru olmadığı üçün yalnız ADSL internetdən istifadə etməyə məcburdurlar.

Onların sözlərinə görə, poçta daxili internetə qoşulmaq üçün müraciət etdikdə tarifi 10 manat olan xidmətə görə 50 manat pul istənilir, qoşulma prosesi 10 günədək uzadılır.

Lakin nəticədə internetdən normal istifadə etmək mümkün olmur. İnternet xətti qırıldıqda isə təmir işləri də qəsdən uzadılır.

Yerli sakin M. Q. bildirir ki, bu özbaşınalıqların arxasında rayon Poçt İdarəsinin baş mühəndisinin göstərişləri dayanır:

“Bir neçə ay əvvəl internetə qoşulmaq üçün poçta müraciət etdim. Qeydə aldılar və dedilər ki, qoşulma 50 manatdır, 3 Mbit/s üçün isə hər ay 18 manat ödəməlisən. Çəkiliş rüsumunun 10 manat olduğunu dedim, amma yenə də məni 10 gün get-gələ saldılar. Nazirliyə şikayət etsəm də, heç bir nəticə olmadı. Axırda məcbur qalıb dedikləri pulu ödədim. 50 manat aldılar, amma yalnız 10 manat üçün qəbz verdilər.

İndi hər ay 18 manat ödəyirəm, amma internetdən normal istifadə edə bilmirəm. WhatsApp-la danışanda belə tez-tez kəsilir, televizora normal baxmaq mümkün deyil. Xətt tez-tez qırılır, onlarla abonent internetsiz qalır, düzəlməsi günlərlə çəkir. Baş mühəndisin göstərişi olmadan işçilər heç nəyi düzəltmir. Şikayətlərə baxan da yoxdur.”

Digər şikayətçi C. Q. da hər ay 20 manat ödəməsinə baxmayaraq internetin həddindən artıq zəif olmasından, bəzən isə həftələrlə ümumiyyətlə verilməməsindən narazıdır:

“Əvvəllər hər ay 15 manat ödəyirdim, amma 2 Mbit sürət əvəzinə 1 Mbitdən də zəif internet verirdilər. Dedilər 20 manata keç, sürəti artıraq. Keçdim. İki aydır 20 manat ödəyirəm, amma 3 Mbit əvəzinə yenə də 1 Mbit internet verilir. Çox vaxt xətt qırılır, gəlib düzəldən olmur.

İndiki dövrdə insanlar bütün işlərini internet üzərindən görür. Biz isə qohum-qardaşla görüntülü danışmaqda belə çətinlik çəkirik. Düşmüşük bəlaya.”