Bakının mərkəzindəki “Bayırşəhər məhəlləsi” adlanan ərazidə - “Təzə Pir” məscidinin ətrafında söküntülər davam edir. Söküntü prosesi sakinlərin narazılığı ilə müşayiət olunur.
Sakinlərin bir qismi bu ərazidəki söküntünü “Bakının tarixinin silinməsi” kimi dəyərləndirir. Onlar bildirir ki, oradakı binaların bir çoxu tarixi-memarlıq abidələridir. Bu səbəbdən ümumiyyətlə, evlərini tərk etmək istəmirlər.
Sakinlərin bir hissəsi isə onlara təklif olunan kompensasiyanın azlığına etiraz edir. Onlara evlərinin hər kvadrat metrinə görə 2700 manatdan kompensasiya təklif olunur. Bildirirlər ki, ömür boyu Bakının mərkəzində yaşadıqları halda, təklif olunan məbləğə nəinki mərkəzdə, hətta nisbətən yaxın ərazilərdə də ev almaq mümkün deyil. Qeyri-yaşayış sahələrinin (obyektlərin) sahiblərinə isə kvadrat metrə görə 3000 manat pul təklif edilir.
Ərazidəki söküntü Bakı Şəhər İcra Hakimiyyətinin başçısı Eldar Əzizovun sərəncamı əsasında həyata keçirilir. Sərəncama əsasən, Azərbaycan prospekti ilə Mirzə Fətəli Axundov, Nizami və Mirzağa Əliyev küçələri arasında qalan ərazi sökülməlidir. 6 aydır ki, sərəncamın icrası başlayıb.
Sakinləri narazı salan məqamlardan biri də alınmış evlərin söküntüsü zamanı ətrafdakı mənzillərin su, qaz xətlərinin sıradan çıxarılması, evindən çıxmaq istəməyən vətəndaşların dözülməz şəraitdə yaşamağa məcbur edilməsidir.
"DİA-AZ" xəbər verir ki, dekabrın 1-də Vidadı küçəsi 52 ünvanında söküntü işləri aparılarkən sakinlərlə Bakı şəhər İcra Hakimiyyətinin nümayəndələri, eləcə də söküntünü icra edən şəxslər arasında problem yaşanıb. Sakinlər həyətdə söküntü aparılmasına etiraz edib, qaz xəttinin sıradan çıxdığını bildiriblər: “Biz yaşaya-yaşaya həyəti sökürlər, insanların mülkiyyətində olan şkafları sındırırlar. Bütün bu proseslərə də Zülfəli adlı şəxs (Bakı Şəhər İcra Hakimiyyətinin şöbə müdiri Zülfəli İsmayılov) rəhbərlik edir. Dövlətin qayda-qanunu sənədlə olur. Heç bir sənəd göstərmədən söküb-dağıdırlar”.
İndi isə aydın olur ki, Zülfəli müəllim dişlərini yeni hədəflər üçün qıcayıb... Bu dəfə isə hədəfdə növbəti tarixi abidədir.
Bu, Bayırşəhər ərazisində, Mirzə Fətəli Axundzadə küçəsi 79/81 ünvanında yerləşən və evlə birlikdə sökülməsi planlaşdırılan 19-cu əsrə aid hamamdır. Sakinlərdən dəfələrlə evlərini satmaq və bu tarixi məkanı tərk etmək istənilib, sadəcə, bunu etmədikləri üçün ev və onun qədim hamamı hələ də qalmaqdadır.
