Bakının mərkəzində söküntü işləri aparan daha bir şirkətlə sakinlər arasında qalmaqal yaşanır. Metronun “Elmlər Akademiyası” stansiyasının yaxınlığında yaşayan bir qrup sakin evlərindən çıxmaq istəmədiklərinə görə məhkəməyə verilib.

Bizimyol.info xəbər verir ki, “Lux Residence” MMC rəhbərliyi şirkətlə razılaşmayan sakinlərin məcburi şəkildə evlərindən çıxarılması tələbi ilə məhkəmədə iddia qaldırıb.

Şirkət iddia edir ki, Bakı şəhər İcra Hakimiyyəti başçısının 2020-ci ildə imzaladığı sərəncamla 4.20 hektar torpaq sahəsində (icarə əsasında) yaşayış binaları və qeyri-yaşayış sahələrinin tikintisi üçün “Lux Residence” şirkətinə icazə verilib. Həmin 4.20 hektarlıq ərazi paytaxtın Yasamal rayonu, Ələsgər Ələkbərov, Seyfəddin Dağlı, İsmayıl Qutqaşınlı və Mikayıl Müşfiq küçələrinin kəsişməsində yerləşir.

Fövqəladə Hallar Nazirliyinin tabeliyində olan Dövlət Layihə İnstitutunun - “Azərdövlətsənayelayihə”nin mütəxəssislərindən də rəy alınıb ki, ərazidəki evlər uzun müddət təmirsiz istismar edildiyinə görə köhnəlib və fiziki aşınmaya məruz qalıb, əsas divarlarda çatlar var, kommunikasiya sistemləri – elektrik, su və kanalizasiya xətləri köhnəlmiş və yararsız vəziyyətdədir.

Sərəncama əsasən, oradakı köhnə tikililərin sökülməsi, sakinlərin qarşılıqlı razılaşma əsasında köçürülməsi məsələsi “Lux Residence” MMC-yə həvalə olunub.

Şirkət iddia edir ki, 250-dən artıq sakinlə evlərin sökülməsi və yeni mənzilin tikilərək təhvil verilməsi barədə müqavilələr bağlanıb. “Lux Residence” öz üzərinə sökülən evlərin əvəzinə yeni binalar tikib, sakinlərə sahib olduqları evlərin əvəzinə o binalarda təmirli mənzillər verməyi, o vaxta qədər onları kirayə haqqı ilə təmin etməyi öhdəsinə götürüb.

“Tikilməli olan yeni binaların əksəriyyəti tamamlanıb. Lakin razılığa gəlməyən bəzi sakinlərə görə layihə üzrə tikilməli olan bəzi binaların inşasına başlamaq mümkün olmayıb”, - şirkət məhkəməyə iddia ərizəsində yazıb.

Məhkəməyə verilən narazı sakinlərdən biri deyir ki, əgər evindən çıxarılırsa, əvəzində ədalətli kompensasiya istəyir. O, şirkətin iddia tələbini qətiyyən qəbul etmədiyini bildirib və məhkəmədən onun rədd edilməsini xahiş edib: “Mən doğulandan həmin evdə yaşayıram. Anam da mənimlə birlikdə yaşayırdı. Anam vəfat edəndən sonra o evə faktiki mən sahiblik etmişəm”.

Yeni binada mənzil razılaşmasına “yox” deyən sakinlər illərlə kirayə qalıb, onlara veriləcək evlərin tikintisini gözləmək istəmir. Deyirlər ki, “yeni binada mənzil veriləcək” vədi ilə evindən çıxarılan və 10 ilə yaxındır gözləyən insanlar var. Onların vəziyyətinə düşmək istəmirlər.

Sakinlərin evlərindən məcburi çıxarılması ilə bağlı şirkətin müxtəlif mənzil sahiblərinə qarşı qaldırdığı iddialara Yasamal Rayon Məhkəməsində baxılıb. Sakinlərin etirazlarına baxmayaraq, məhkəmə şirkətin iddiasını təmin edib. Bəzi sakinlərə onların tələb etdiyi məbləğdən daha aşağı kompensasiya, bəzilərinə isə tikiləcək binada mənzil verilməsi əvəzində evlərindən məcburi çıxarılmalarına qərar verilib.

"DİA-AZ"-dan: Əslində burada “Lux Residence”nin vətəndaşa qarşı etdikləri bir özbaşınalıq faktıdır. Təsəvvür edin. Sahibi olduğunuz mənzilə günlərin biri bir nəfər yaxınlaşır ki, evinizdən çıxın... mən burda göydələn tikəcəm. Siz də öz qiymətinizi deyirsiniz. Çünki satılacaq olan sizə aiddir. Və əvəzində müştəri hesab olunan tərəf sizə öz absurd qiymətini təklif edir və hətta bunu həzm etdirmək üçün sizi məhkəməyə də verir. Və maləsəf, bəzi hallarda məhkəmələr belə özbaşına qalmış tikinti şirkətlərinə haqq qazandırır...