Azərbaycanda bir müddət əvvəl bələdiyyələr birləşdirilərək, sayları kəskin azaldılaraq, ümumilikdə 685-ə endirilsə də, keyfiyyətdə heç bir dəyişiklik nəzərə çarpmır. Ölkədə bələdiyyə institutunun effektiv fəaliyyət göstərmədiyini birmənalı söyləmək olar.

Bizimyol.info xəbər verir ki, ölkə üzrə 685 bələdiyyədən yalınız 32-si 6 aylıq fəaliyyətilə bağlı hesabat yayıb. Bu isə təxminən 5 faiz deməkdir.

Müşahidələr göstərir ki, bələdiyyələrin bir çoxu heç öz iclaslarını belə keçirmirlər. Halbuki, onların ayda bir dəfədən az olmayaraq, iclas keçirmək, müəyyən məsələləri orada müzakirə etmək, tədbirlər görmək, qərarlar qəbul etmək öhdəlikləri var.

Bələdiyyə öz fəaliyyətini iclaslar, daimi və başqa komissiyalar vasitəsi ilə həyata keçirir. Bələdiyyənin iclasları ayda bir dəfədən az olmayaraq bələdiyyənin sədri tərəfindən çağırılır. Bələdiyyənin iclası bələdiyyə üzvlərinin yarıdan çoxu iştirak etdikdə səlahiyyətlidir.

Bələdiyyənin iclaslarında baxılan məsələlərə dair kollegial qaydada, bələdiyyə üzvlərinin sadə səs çoxluğu ilə qərarlar qəbul edilir. Yerli vergilər və ödənişlər ilə bağlı qərarlar bələdiyyə üzvlərinin üçdə iki səs çoxluğu ilə qəbul edilir.

Astara rayonunun Siyaku kənd bələdiyyəsinin iclasları nəinki ayda bir dəfə, fevraldan bu yana keçirilmir. Bunu bələdiyyənin üzvü Rüfət Əliyev də təsdiqləyib.

Qeyd edək ki, Siyaku kənd bələdiyyəsinin sədri Ramin Dədəyevdir.

“Faktiki bu bələdiyyənin heç bir fəaliyyəti yoxdur. Deyilənə görə, Ramin Dədəyev də Astara Rayon İcra Hakimiyyətinin başçısı Qəzənfər Ağayevə yaxındır. Ona güvənir. Bu kəndin nə icra nümayəndəsi qanunları sayır, nə də bələdiyyəsi. Hamısı da icra hakimiyyətindən qaynaqlanır”, - kənd sakinləri gileylənir.