Bir neçə gün əvvəl yerli KİV-də yer alan şok bir xəbər nədənsə mahiyyəti üzrə adekvat reaksiya ilə müşayiət olunmadı. "DİA-AZ" xatırladır ki, burada söhbət təhsilsiz birinin olduqca ağır bir tibbi sahədə həkim kimi fəaliyyət göstərməsindən gedir. Xəbərdə deyilirdi ki, "Atlas Medical Center"də fəaliyyət göstərən onkoginekoloq Turanə Nəsibovanın tibbi təhsili yoxdur.
Bildirilirdi ki, sözügedən şəxsin tibbi fəaliyyət göstərə bilməsi üçün nəinki ali, heç orta ixtisas təhsili də yoxdur.
Məsələ ilə bağlı Səhiyyə Nazirliyi Analitik Ekspertiza Mərkəzindən (AEM) bildirilib ki, Azərbaycan Respublikasında praktik tibb fəaliyyəti ilə məşğul olmaq hüququ olan həkimlər və orta tibb işçiləri barədə məlumatlar Səhiyyə Nazirliyinin "Tibb kadrlarının vahid reyestri"ndə əks olunur. Sözügedən reyestrdə Turanə Nəsibova ilə bağlı hər hansı məlumat yer almır.
Onkoginekoloq adı altında çalışan Turanə Nəsibova və "Atlas Medical Center" ilə əlaqə saxlamağa çalışsaq da, telefonumuza cavab verən olmadı.
Maraqlı burasıdır ki, Turanə Nəsibova olduqca ağır və məsuliyyətli, daha çox və daha ciddi bilik, təcrübə tələb edən bir sahədə - Ginekoloji Xərçəngdən əziyyət çəkənlərin müalicəsi yönündə fəaliyyət göstərsə də, bu rəsmilərimizi, xüsusilə də TƏBİB və Səhiyyə Nazirliyini, habelə hüquq mühafizə orqanlarını narahat etmir.
Cənablar, BU NƏDİ BELƏ? Bu nəyin arxayınçılığıdır? Yəni insanlarımızın - ANA VƏ BACILARIMIZIN həyatı bu qədərmi dəyərsizdir ki, onları hər yoldan keçənə əmanət edirik?
Məsələ diqqətimizdədir...
