Gömrük sistemində böhran dərinləşir. Keçən ilin payızından əməkdaşların maaşları verilmirdi. Məsələ ictimailəşəndən sonra rəhbərlik problemi etiraf etmək məcburiyyətində qalmışdı. Bildirilmişdi ki, hamı maaşını alacaq, məsələnin həlli uzun sürməyəcək. Bundan bir qədər keçəndən sonra gömrükçülərin iki aylıq məvacibi alması barədə xəbər yayıldı. Lakin yenə də daha iki ayın maaşının verilməsi məsələsi açıq qalmışdı.

Bizimyol.info xəbər verir ki, 2025-ci ilin əvvəlindən gömrük sistemində pensiya ilə bağlı da problem yaranmışdı. Keçmiş gömrükçülərə çatacaq məbləğ kəsilmişdi. Onlar etiraz etməyə başlamışdı. Bundan başqa, məlum olmuşdu ki, Dövlət Gömrük Komitəsinin tələbələrinə də son iki ayın müavinəti verilməyib.

Gömrük sistemində nə baş verdiyini bilmək olmur. İndi də Gömrük Komitəsinin əməkdaşlarına məzuniyyətlə bağlı onlara iradələrindən kənar ərizə yazdırıldığı bildirilir. İddiaya görə, ötən ilin məzuniyyət günləri 2025-ci ilin əsas məzuniyyətinə birləşdirilir. Əmək Məcəlləsi əməkdaşların hər il məzuniyyət zamanı biraylıq əməkhaqqı həcmində müavinət almalı olduğunu deyir. Komitədə isə buna əməl etmək istəmirlər.

Sosial mediada son xəbərə münasibət göstərir ki, həqiqətən də, gömrük sistemində bu metoddan istifadə edirlər. Platforma istifadəçilərindən Elnarə Rəhimova anası ilə məhz bu cür davranıldığını yazıb. Onun sözlərinə görə, qadına qanunsuz ərizə yazdırılıb, bu yolla pulun verilməməsinə nail olunub.

Bu qəbildən daha bir neçə rəy gözə dəyir. Belə anlaşılır ki, əməkdaşlar işini itirməmək üçün yeniliklə razılaşmaq məcburiyyətində qalırlar. Komitə rəhbərliyi bu dəfə susur. Yenə problemlər ört-basdır edilir. Amma aydın görünür ki, sistemdə ciddi boşluqlar var. Cəmiyyət isə bu sektorda baş verənlərə çox həssasdır. Çünki ictimaiyətin ən çox narazı qaldığı, şikayət etdiyi istiqamətlərdən biri gömrük sistemidir. Kiçik sahibkarlığın sarsılmasında bu sektor ciddi rol oynayıb.