AZAL-ın qiymət siyasəti illərdir dəyişməz qalır. Xüsusən yay aylarında vəziyyət aha da gərginləşir, təyyarə biletlərinin qiyməti elə AZAL-ın təyyarələri kimi havada “uçur”. Türkiyədə təhsil alan tələbələr üçün vəziyyət daha da ağırdır.

Tələbə yay semestrini Vətənində, validyenləri ilə birgə keçirmək üçün ikiqat ödəniş edib Bakıya gəlməlidir. Dünəndən sosial şəbəkələrdə AZAL reyslərinin fantastik qiymətləri açıqlanır. Problmdən çıxış yolu isə var.

İqtisadçı Natiq Cəfərli “Sherg.az”a açıqlamasında bildirdi ki, “AZAL” əlavə reyslər təşkil edə, həmçinin Türkiyədə təhsil alan tələbələrə Türkiyə-Naxçıvan-İran quru yolu ilə sərfəli qiymətə gəliş-keçid təşkil etmək də olar:

- Son 6 ildə dəfələrlə bu problemi qaldırmışıq, bu il yenə məsələ aktuallaşıb – quru sərhədlərin anlaşılmaz bağlı qalması tələblər üçün əlavə yükdür, təyyarə biletləri çox bahadır, yayda təlabat artır deyə, qiymətlər də yüksəlir. Hazırda Türkiyədə təhsil alan azərbaycanlı tələbələrin sayı 45 minə yaxındır. Bu rəqəm həm bakalavr, həm magistratura, həm də doktorantura səviyyələrində təhsil alan tələbələri əhatə edir. Ümumilikdə Türkiyə Statistika Qurumunun (TÜİK) rəsmi məlumatlarına əsasən, Türkiyədə rəsmi yaşayış icazəsi (ikamet izni) ilə yaşayan Azərbaycan vətəndaşlarının sayı 71 min nəfərə yaxındır. Yay tətili başlayır, Türkiyə artıq ucuz ölkə deyil, bahalıqdır, tələbələrin 2 ay tətil zamanı Türkiyədə qalmaları baha başa gəlir, yay tətilində iş tapmayanlar vətənə dönmək, öz ailəsini görmək, heç olmasa, 2 ay xərclərini azaltmaq istəyirlər. Son 6 ildə dəfələrlə bu problemi qaldırmışıq, bu il yenə məsələ aktuallaşıb – quru sərhədlərin anlaşılmaz bağlı qalması tələblər üçün əlavə yükdür, təyyarə biletləri çox bahadır, yayda təlabat artır deyə, qiymətlər də yüksəlir.

N.Cəfərli Naxçıvan yolu ilə ölkəyə gediş-gəlişin təşkil oluna biləcəyini də vurğuladı:

- Naxçıvanda qeydiyyatda olanlar üçün Türkiyə ilə quru sərhədlər açıqdır – bu doğrudur, çünki naxçıvanlılar üçün sərhədin açıq olması lazımdır. Amma, bu vətəndaşlar arasında qeyri-bərabərlik yaradır – bu məsələdə, heç olmasa, tələbələr üçün şərait yaradılmalıdır. Təsəvvür edin ki, eyni Universitetdə 2 azərbaycanlı oxuyur, biri, məsələn, Şəkidə, digəri isə Naxçıvanda qeydiyyatdadır. Naxçıvan qeydiyyatı olan tələbə cəmi 50-60 manat xərc çəkərək Türkiyənin müxtəlif şəhərlərindən evinə gələ bilir, amma şəkili, gəncəli, qubalı, bakılı gələ bilmir – bu ədalətli deyil axı. Quru sərhədlər tam açılmalıdır – bu heç, amma, heç olmasa Türkiyədə təhsil alan tələbələr üçün Naxçıvandan girişə icazə verilməli, onlar ucuz qiymətə vətənə dönməlidirlər. Naxçıvandan İran ərazisindən keçməklə avtobus marşrutu da var – onlar cəmi 100-120 manata Bakıya gəlib çıxa bilərlər. Bəli, yol uzun, yorucu olur, amma, tələblər gəncdir, onlara vəsaitə qənaət etmək daha vacibdir. Nazirlər Kabinetinə çağırışım odur ki, lütfən, bu məsələyə baxın, bircə qərarla onminlərlə insanın problemini həll etmiş olarsınız.