Xəbər verdiyimiz kimi, araşdırmaçı jurnalist Cavanşir Həsənli Qafqaz Müsəlmanları İdarəsinin (QMİ) sədri Şeyxülislam Hacı Allahşükür Paşazadənin ailəsi ilə iş adamı Mübariz Mənsimov arasında mümkün əlaqələr barədə sensasion iddialar irəli sürüb.
Sitat:
“Mübariz Mənsimova məxsus ARMADA VOYAGER SİX gəmiçilik şirkəti öz səhmlərini Allahşükür Paşazadənin oğlu Məhəmməd Paşazadənin Maltadakı MP TRADE SHIPPING LIMITED şirkətinə keçirib”.
Bununla yanaşı, Türkiyədə yaşayan azərbaycanlı iş adamı Mübariz Mənsimovun hazırda həbsdə olan sabiq PA rəhbəri Ramiz Mehdiyevlə gizli münasibətləri barədə iddialar ortaya çıxıb. Həmin iddialara görə, bu iki fiqur arasında körpü rolunu Şeyxülislam Hacı Allahşükür Paşazadə oynayıb.
Bu məlumatlar təsdiqlənərsə, Paşazadələri nə gözləyir? Mübariz Mənsimov “Mehdiyev işi”nə görə istintaqa cəlb edilə bilərmi?
Globalinfo.az-a danışan hüquqşünas Əlövsət Əliyev deyib ki, məlumatda söhbət birbaşa Allahşükür Paşazadənin özündən deyil, oğlu Məhəmməd Paşazadənin Maltada qeydiyyatda olan MP Trade Shipping Limited adlı şirkəti ilə Mübariz Mənsimova məxsus ARMADA VOYAGER SIX şirkəti arasında iddia edilən səhmdar münasibətlərindən gedir:
“Bu məqam hüquqi baxımdan prinsipialdır, çünki məsuliyyətin subyekti də məhz fiziki və ya hüquqi şəxs olaraq düzgün müəyyən edilməlidir. İkincisi, Azərbaycan hüquq təcrübəsində media və ya jurnalist araşdırmalarında səslənən bu tip məlumatlar nadir hallarda istintaq araşdırmasının predmetinə çevrilir. Cinayət-prosessual qanunvericilik formal olaraq buna imkan versə də, real müstəvidə belə araşdırmaların başlanması birbaşa siyasi iradədən asılı olur. Yəni hüquqi mexanizmlər mövcuddur, lakin onların işə düşməsi selektiv xarakter daşıyır. Əgər iddia olunan faktlar rəsmi sənədlərlə təsdiqlənsə, nəzəri olaraq aşağıdakı hüquqi istiqamətlər üzrə araşdırma predmeti yarana bilər:
* Gizli benefisiar sahiblik (şirkətin real sahibinin gizlədilməsi);
* Vəzifəli şəxslərin ailə üzvlərinin kommersiya fəaliyyətində imtiyazlı mövqe əldə etməsi (əgər dolayı təsir sübut olunarsa);
* Ofşor yurisdiksiyalar vasitəsilə maliyyə şəffaflığının pozulması;
* Cinayət yolu ilə əldə edilmiş vəsaitlərin leqallaşdırılması ehtimalı (yalnız sübutlar olarsa). Lakin vacib hüquqi nüans budur ki, dini vəzifə daşıyan şəxsin ailə üzvünün biznes fəaliyyəti avtomatik olaraq cinayət tərkibi yaratmır.
Cinayət məsuliyyəti yalnız:
* vəzifədən birbaşa və ya dolayı sui-istifadə;
* təzyiq, himayəçilik və ya məcburetmə mexanizmləri sübut edildikdə yarana bilər. Mübariz Mənsimovun “Mehdiyev işi” kontekstində istintaqa cəlb olunması aşağıdakı hallarda halda hüquqi əsas qazana bilər:
- O, qanunsuz proseslərin iştirakçısı olubsa və bunu sübut edən faktlar varsa;
- Yaxud əksinə, payların ötürülməsi təzyiq və ya qeyri-rəsmi göstərişlər nəticəsində baş veribsə, bu halda o, hüquqi baxımdan zərərçəkən və ya şahid kimi cəlb oluna bilər”.
