Cənubi Qafqazda uzun illər davam edən münaqişələr regionun inkişafına mənfi təsir göstərib. Lakin son razılaşmalar və sülh təşəbbüsləri yeni reallıqlar yaradıb. Gürcüstanın xarici işlər naziri Maka Boçorişvili Tbilisidə Ermənistan xarici işlər naziri Ararat Mirzoyan ilə görüşdən sonra bildirib ki, avqustun 8-də Vaşinqtonda əldə olunan sülh razılaşmasını Gürcüstan alqışlayır. Nazir vurğulayıb ki, bu razılaşma Cənubi Qafqazda davamlı sülh və regional əməkdaşlıq üçün imkanlar açır və Tbilisi bu prosesdə aktiv rol oynamağa davam edəcək.

Politoloq Turan Rzayev Sherg.az-a açıqlamasında Gürcüstannın Azərbaycan-Ermənistan münaqişəsinin həllində maraqlı ölkə olduğunu və bunu müsbət qarşıladığını söyləyib:

"Bu mövqe bir daha göstərir ki, Tibilisi baş verən prosesləri və yeni realıqları yaxından izləyir, qiymətləndirir və ona uyğun olaraq konstruktiv mövqe sərgiləyir. Cənubi Qafqaz uzun müddət çox təəssüf ki, münaqişələr zonası kimi mənfi bir ad qazanıb. Amma sevindirici haldır ki, artıq münaqişələrin böyük ölçüdə həllinə nail olunub. Xüsusilə, Vaşinqtonda avqustun 8-də əldə olunan razılaşma münaqişənin təxminən 80%-nin həll edildiyini göstərir. Qalan 20% isə əsasən texniki məsələlərdir. Bunlara delimitasiya, anklavlar və paraflanmış sülh sazişinin imzalanması daxildir. Sülh sazişi Gürcüstanı da yaxından maraqlandırır və ümumilikdə bu Gürcüstan üçün müsbət tendensiya sayılır. Artıq Gürcüstan yalnız Bakı ilə İrəvan arasında qalmayacaq və hər iki tərəflə əməkdaşlıq apara biləcək. Paralel olaraq, Gürcüstanın uzun müddətdir gündəmə gətirdiyi “Vahid Qafqaz evi” layihəsi də yenidən aktuallaşa bilər. Bu məsələdə Tiblisi artıq yenidən layihənin bazasını formalaşdırır. Eyni zamanda, Gürcüstanın narahatlığı da başa düşüləndir. Belə ki, bəzi dairələrdə yanlış təsəvvür formalaşıb. Guya Ermənistan-Azərbaycan arasında sülh müqaviləsi imzalanarsa və iqtisadi münasibətlər bərpa olunarsa, Gürcüstan regiondan kənarlaşdırıla bilər".

Politoloq bu vaxta qədər Azərbaycanın təhlükəsizlik adası rolunu oynayan Gürcüstan üzərindən layihələr həyata keçirdiyini vurğulayıb:

"Bakı-Tbilisi-Qars, Bakı-Tbilisi-Ərzurum, TANAP və digər layihələr Gürcüstan üzərindən keçib. Amma indi Ermənistan da bu layihələrə qoşula bilər və bəzi dairələrdə bunun Gürcüstanın rolunu azaldacağı təəssüratını yaradıb. Lakin reallıq belə deyil. Gürcüstan bu məsələdə əksinə, yeni imkanlar qazanacaq. Yeni layihələrdə Tbilisinin rolu daha da artacaq. Batum və Poti limanları Gürcüstanda olduğu müddətcə bu ölkə həmişə aktiv iştirakçı olacaq. Görünür, Gürcüstan hakimiyyəti də bunun fərqindədir və buna görə bu tipli açıqlamalar verir.Qonşu ölkənin məsələyə bu qədər yaxından maraq göstərməsi müsbət haldır. Bu, həm də Gürcüstana olan inamı artırır".