Məlum olduğu kimi, Bakı şəhəri Səbail rayon Məhkəməsi Mehdiyev Ramiz Ənvər oğlu barəsində cinayət işi üzrə qərar qəbul edib.

Qərara əsasən, xüsusilə ağır cinayət əməllərinə görə cinayət məsuliyyətinə cəlb edilən R.Mehdiyev barəsində 4 ay müddətinə ev dustaqlığı qətimkan tədbiri seçilib.

Qeyd edək ki, Ramiz Mehdiyev 1995–2019-cu illərdə Prezident Administrasiyasının rəhbəri, 2019–2022-ci illərdə isə Azərbaycan Milli Elmlər Akademiyasının prezidenti vəzifəsində çalışıb.

Bu qərardan sonra ictimaiyyətdə bir sıra suallar yaranıb. Belə ki, əgər məhkəmənin qərarı ilə ev dustaqlığı qətimkan tədbiri seçilibsə və həmin şəxsə məxsus bir neçə mənzil varsa, o, yalnız məhkəmənin müəyyən etdiyi ünvanda qalmalıdır, yoxsa digər evlərə də keçid edə bilər? Bundan əlavə, ev dustaqlığı qətimkan tədbirinin yerinə yetirilməsi ilə bağlı hansı hüquqi tələblər mövcuddur?

Məsələ ilə bağlı “Cebheinfo.az”-a açıqlama verən hüquqşünas Əkrəm Həsənov bildirib ki, bir qayda olaraq, ev dustaqlığına məhkum edilən şəxsin qeydiyyatda olduğu ünvan əsas götürülür:

“Əlbəttə ki, həmin şəxsin bir neçə mənzili ola bilər, amma qeydiyyat ünvanı bir olur. Ev dustaqlığı qətimkan tədbirinin icrası zamanı adətən həmin ünvanda ona elektron qolbaq (braslet) taxılır. Yəni heç kim onun evinin qarşısında dayanmır və daim nəzarət etmir. Elektron qolbaq vasitəsilə həmin şəxsin hərəkəti izlənilir və bu yolla onun evdən çıxmadığına əmin olurlar. Əgər o, bu qaydaları pozarsa, məhkəmə tərəfindən daha ciddi qətimkan tədbiri seçilə bilər, cümlədən də həbs edilə bilər”.