Azərbaycan Prezident Adminstrasiyasının sabiq rəhbəri və AMEA-nın keçmiş prezidenti Ramiz Mehdiyev barəsində verilən qərar mühüm islahatlara gətirib çıxara bilər.

Çünki dövlət idarəetmə orqanlarında 24 il yüksək dövlət vəzifələrində çalışmış Ramiz Mehdiyev Azərbaycanda kadrların seçilməsində və təyinatında xüsusi rol oynayıb. O, 1995-2009-cu illərdə Azərbaycan Prezidentinin İcra Aparatının, 2009-2019-cu illərdə isə Azərbaycan Prezident Adminstrasiyasının rəhbəri vəzifələrində çalışıb.

Bu isə Ramiz Mehdiyevə öz səlahiyyətlərindən istifadə edərək icra hakimiyyəti orqanlarında kadrların təyinatına müdaxilə etmək imkanı yaradıb. Ramiz Mehdiyev yerliçilik, qohumbazlıq, dostluq və digər şəxsi maraqlara söykənən üsullardan istifadə edərək özünə yaxın adamlara vəzifələr verib.

Ramiz Mehdiyev həmişə siyasi “kölgə”də qalmağa və görünməz əl kimi kadr siyasətinə müdaxilə etməyə çalışıb. Eyni zamanda, Ramiz Mehdiyev yaxın çevrəsinə aid olan şəxslərin deputat seçilməsi üçün onların namizədliklərini irəli sürdürüb, bəzi deputatları öz tərəfinə çəkməyə çalışıb. Məhz bu fəaliyyət prinsipinə görə ona “boz kardinal” ləqəbi verilib.

Ramiz Mehdiyev Prezident Adminstrasiyasının rəhbəri vəzifəsindən çıxarıldıqdan sonra Azərbaycan hakimiyyət orqanlarına yeni, cavan və yüksək təhsilli kadrlar təyinat alıb. Lakin hələ də dövlət orqanlarında R.Mehdiyevin yerləşdirdiyi adamlar qalmaqdadır. Ramiz Mehdiyev ona verilən səlahiyyətdən, etibardan sui-istifadə edərək idarəetmə sistemində şəbəkə qurub.

Cinayət Məcəlləsinin 274 (Dövlətə xəyanət), 278 (Hakimiyyəti zorla ələ keçirmə və ya onu zorla saxlama) və 193-1-ci (cinayət yolu ilə əldə edilmiş pul vəsaitlərinin leqallaşdırılması) maddələri ilə ittiham edilən Ramiz Mehdiyev barədə irəli sürülən ittiham aktı və əldə olunan informasiyaların ilkin təhlili göstərir ki, Ramiz Mehdiyev bu yolla gələcəkdə hakimiyyəti ələ keçirmək üçün özünə siyasi komanda formalaşdırmağa cəhd edib.

O, məqsədinə çatmaq üçün xaricdə dəstək axtarışına çıxıb və Rusiyanın Azərbaycandakı “5-ci kolon”una rəhbərlik edib. Hətta vəzifədən getdikdən sonra belə, 85 yaşlı R.Mehdiyev öz iddiasından əl çəkməyib. Çünki onun hakimiyyət orqanlarına yerləşdirdiyi kadrların bir çoxu hələ vəzifə başındadır. Görünür, Mehdiyev ümidini daxildə onlara, xaricdə isə Azərbaycanın son illər qazandığı böyük geosiyasi uğurlarını qəbul edə bilməyən ölkələrə bağlayıb.

R.Mehdiyevin təşkil etdiyi “klan” onun üçün həm də korrupsiya yolu ilə külli miqdarda gəlir əldə etmək vasitəsi olub. Çoxsaylı malikanələr, mənzillər, torpaq sahələri, bank və pullar R.Mehdiyevin vəzifədə olarkən hansı əməllərlə məşğul olduğunu əyani sübut edir.

Hüquq-mühafizə orqanları R.Mehdiyevi həbs edərək neytrallaşdırsa da, Azərbaycan dövlətinə qarşı yaranmış təhlükənin aradan qalxdığını demək tezdir. Çünki Mehdiyev “klanı”nın bir sıra üzvləri hələ iş başındadır. Ona görə də belə adamların fəaliyyəti ciddi yoxlanılmalı, onların Mehdiyevə bağlılığı aşkar olunarsa, dərhal vəzifədən azad edilməlidir.

Ramiz Mehdiyevin şəbəkəsinin dövlət orqanlarından uzaqlaşdırılması Azərbaycanda idarəetmə sistemində yeni kadr islahatlarına təkan vermiş olar. Ümumiyyətlə, Azərbaycan yerli icra hakimiyyəti orqanlarının yenidən formalaşdırılması istiqamətində islahatların aparılacağı təklif edilir. Bu proses çərçivəsində Mehdiyev “klanı”nın bütün üzvləri hakimiyyət orqanlarından, tutduqları vəzifələrdən kənarlaşdırılmalıdırlar.

Müşfiq Abdulla
"Cebheinfo.az"