Ermənistan hökuməti sərhəd keçid möhürlərindən Türkiyə ərazisində yerləşən Ağrı dağının təsvirini çıxarmaq barədə qərar qəbul edib. Bu barədə “Torpaq həyatı üçün” erməni partiyasının həmtəsisçisi Mesrop Arakelyan Facebook səhifəsində yazıb.
Məlumata görə, qərar hələ sentyabrın 11-də qəbul edilib. İndi möhürdə yalnız Ermənistan sərhəd-keçid məntəqəsinin detalları əks olunacaq.
“Ermənistan” sözünü də möhürdən çıxara bilərdilər? Amma onlar bunu etmədilər”, – deyə Arakelyan yazıb. Görünür, siyasətçi baş verənlərdən təəssüflənir. Halbuki, bu addım tamamilə məntiqlidir – qonşu dövlətin ərazisini öz rəsmi möhüründə təsvir etmək doğru siyasət deyil. Xüsusən də, nəhayət həmin qonşu ilə normal münasibətlər qurmaq niyyətini bəyan edirsənsə.
Yeni möhür nümunələri artıq təsdiqlənib, dəyişikliklər 2025-ci il 1 noyabr tarixindən qüvvəyə minəcək.
Qərardan açıq şəkildə narazılığını ifadə edənlərdən biri də parlamentdəki müxalif “Ermənistan” fraksiyasının deputatı Artur Xaçatryandır. “Müstəqil və suveren Ermənistanın hakimiyyəti sərhəd-keçid möhürlərindən “Ararat” dağının (Ağrı dağı – red.) təsvirini çıxarmağa qərar verib. Ola bilsin, bu, Sərdar Kılıçın (Türkiyənin Ermənistanla danışıqlarında rəsmi nümayəndəsi – red.) səfərinə görə ödənilən qiymət idi. Yaxud, Ərdoğan səhər zəng edib əyləncə üçün növbəti təhqirini nümayiş etdirməyi qərara alıb. İndi isə təsəvvür edin, daha ciddi “kompromis” qarşılığında Nikoldan nə tələb edəcəklər. Məsələn, seçkilər ərəfəsində onu tərifləməyi, xalqı müxalifət və müharibə ilə qorxudaraq Nikolu təbliğ etməyi. Nə qədər ki Nikol hakimiyyətdədir, biz alçaldılma və məğlubiyyətləri sayıb qurtara bilməyəcəyik…”, – Xaçatryan sosial şəbəkədə yazıb.
Lakin bir daha qeyd edək: rəsmi İrəvanın atdığı bu addım hazırda gedən barış proseslərin məntiqinə ziddir? Üstəlik, Ermənistanın Türkiyə ilə münasibətləri tam normallaşdırması və diplomatik əlaqələri bərpa etməsi üçün Konstitusiyaya da dəyişiklik etməsi, “Qərbi Ermənistan” – yəni Türkiyə Respublikasının şərq hissəsinə ərazi iddialarından imtina etməsi lazım gələcək. Bu isə hələ qarşıda görüləsi çox iş olduğunu göstərir: sərhəd möhürünün dəyişdirilməsi gələcəkdə atılacaq addımların fonunda xırda detal sayılır. Bu səbəbdən də ortaya sual çıxır: əgər Arakelyan və Xaçatryan kimi narazı siyasətçilərin, deputatların sayı onlarla, yüzlərlə olsa, konstitusiya referendumu keçirmək mümkün olacaqmı?
Təhlükəsizlik eksperti İlham İsmayıl mövzu ilə bağlı fikirlərini Pressklub.az-la bölüşüb.
Onun sözlərinə görə, rəsmi İrəvanın Konstitusiyanı, gerbi və himni dəyişmək təklifləri əvvəldən məlum idi. “Paşinyan hökumətinə qarşı çıxan qüvvələr bu təklifə dəfələrlə etiraz ediblər. Hökumət parlament seçkiləri ərəfəsində rusiyapərəst qüvvələrə əlavə bəhanə verməmək üçün bu təklifləri tez-tez gündəmə gətirməmək qərarına gəlib. Lakin Vaşinqtonda Azərbaycan və Ermənistan arasında sülh sazişi paraflandıqdan sonra Türkiyə ilə sərhədlərin açılması məsələsi hər iki ölkənin gündəmindədir və bunun sülh sazişi imzalanmamışdan öncə də həyata keçirilə biləcəyi istisna edilmir”, – ekspert bildirib.
Onun sözlərinə görə, böyük ehtimalla, Ağrı dağının təsvirinin sərhəd möhüründən çıxarılması qərarının Türkiyə Prezidentinin xüsusi nümayəndəsi Sərdar Kılıç ilə Ruben Rubinyanın son görüşündən sonra acıqlanması tərəflərin sərhədləri yaxın vaxtlarda açmaq əzmindən xəbər verir və bunu ilk addım saymaq olar.
“Təbii ki, erməni deputatları və siyasətçiləri bu məsələdən narazıdırlar. Çoxillik antitürk təbliğatının qısa vaxt ərzində yox olması mümkün deyil və yəqin ki, bu, onilliklər boyu davam edəcək. Lakin Paşinyan hökuməti və Qərb bu istiqamətdə qətiyyətlidir və görünür, məqsədlərinə nail olacaqlar. Buna görə də, Arakelyan və Xaçatryan kimi insanların etirazları həlledici rol oynamayacaq. Əlbəttə, Rusiyanın Ermənistanda dövlət çevrilişi etməyəcəyi təqdirdı”, – İlham İsmayıl yekunlaşdırıb.
