İrəvanda “ARAR” Fondunun ictimai-siyasi məsələlərlə bağlı keçirdiyi sosioloji sorğunun nəticələri açıqlanıb.
“Cebheinfo.az”-ın məlumatına görə, sorğu Ermənistanın bütün ərazisindən təsadüfi seçilmiş abunəçilərin iştirakı ilə telefon müsahibəsi üsulunda aparılıb. İyulun 17-dən avqustun 5-dək aparılan rəy sorğusunda müxtəlif yaş və təhsil səviyyəsinə malik 1015 respondent iştirak edib.
Sorğunun nəticələri yaşa, (ali və aşağı) təhsil və yaşayış yeri (İrəvan, şəhər və kənd yerləri) üzrə qruplaşdırılıb.
Ümumilikdə respondentlərin əksəriyyəti, yəni 58 faizi parlamentin işindən narazıdır. Silahlı qüvvələr və kilsə ənənəvi olaraq yüksək reytinqə malikdir: 62 faiz Müdafiə Nazirliyinin, təxminən 60 faiz kilsənin, 49 faiz polisin işinə yüksək, 24 faiz isə aşağı qiymət verib. Hökumətdən razı olan respondentlərin sayı 28 faiz təşkil edib. 46 faiz isə hökumətdən narazıdır.
Maraqlıdır ki, İrəvana yaxın olan respondentlər hökumətin işindən daha çox narazılığını bildirib. Eyni yanaşma polisdənn arazılığa da aiddir.
Respondentlərin 60 faizi hökumətin daxili siyasətini yanlış və yalnız 33 faizi düzgün hesab edir, 3,6 faizi cavab verməkdə çətinlik çəkib və ya imtina edib.
Respondentlərin 54 faizi hökumətin xarici siyasətini yanlış hesab edir, 38,5 faizi onu dəstəklədiyini bildirib. 7,1 faizi isə cavab verməkdə çətinlik çətib.
Artıq üçüncü ildir keçirilən sorğunun müəllifləri hesab edirlər ki, hər bir uğursuz müxalifət hərəkatı hakimiyyətə dəstəyin artmasına səbəb olur.
Danışıqlar yolu ilə Azərbaycanla uzunmüddətli sülh əldə etməyin mümkün olub-olmaması ilə bağlı suala 73 faiz “yox” cavabını verib. Rəyi soruşulanların yalnız 26 faiz müsbət nəticəyə ümid edib. Sorğunun müəllifləri sorğunun Vaşinqton görüşündən əvvəl aparıldığını qeyd ediblər.
Üstəlik, yaşlı nəsil və maddi cəhətdən təmin olunmuş insanlar Azərbaycanla sülhə nikbin baxırlar. Həmçinin diqqətəlayiq haldır ki, respondentlərin yalnız 5 faizi maliyyə cəhətdən təminatlıdır və ardıcıl olaraq hökumətyönlü mövqe nümayiş etdirir.
“Sünikdən keçən yolun beynəlxalq sülhməramlılar tərəfindən mühafizə olunması ilə razısınızmı?” sualına sorğuya qatılanların yalnız 34 faiz müsbət cavab verib. Respondentlərin 60 faizdən çoxu isə bununla razılaşmayıb.
“Azərbaycanla danışıqlar və sülh sənədinin imzalanması əsl sülhə gətirib çıxaracaqmı?” sualına gəlincə, eespondentlərin 74 faizi buna inanmır, cəmi 25 faizi inanır. Eyni zamanda, gənclərin 80 faizi buna inanmır. Əksəriyyət də kilsəni qorumaq üçün birləşməyə hazır olduqlarını deyib.
Rusiya bazasının Ermənistan Respublikasından çıxarılması məsələsinə gəlincə, 58 faiz buna mənfi, yalnız 38 faiz müsbət cavab verib.
“Ermənistanın kiminlə müttəfiqlik əlaqələri qurmalıdır?” sualına 30 faiz Rusiya, daha sonra İran, ABŞ, Hindistan, təxminən 22 faiz isə Avropa İttifaqı ölkələrini qeyd edib.
