Qarabağ müharibəsindən sonra həm Azərbaycanda, həm Ermənistanda seçkilər oldu və hakimiyyətlər dəyişmədi.

Meharibədə qalib gələn rəhbər - İlham Əliyev də seçkini uddu, müharibədə məğlub olan rəhbər -Nikol Paşinyan da seçkini uddu. Çünki hər iki xalqın seçimi müharibə deyil artıq, sülhdür.

Nəhayət, Ermənistanda da anladılar ki, Azərbaycanla, eləcə də, Türkiyə ilə düşmənçilik Rusiyaya, eləcə də, İrana lazımdır. Buna görə də Paşinyan: "Əgər Qarabağı istəyirsinizsə, məni devirin" deyir. Ermənistanda axır ki, başa düşüblər ki, müharibə bu ölkənin normal inkişaf yoluna çıxmasının qarşısını kəsir. Buna görə müharibə deyil, sülh deyən hökumət populyardır.

Amma hər iki cəmiyyətdə əldə olunmuş ilkin sülhün - paraflanmış sazişin təhlükə altında olduğunu deyənlər də az deyil. Rusiyanın bölgədən çıxmaq istəmədiyi aydındır. Rusiya baş nazirinin müavini Aleksey Overçuk Həştərxanda Azərbaycanlı həmkarı Şahin Mustafayevlə görüşüb. Azərbaycan-Rusiya Hökumətlərarası Komissiyanın iclası keçirilib. Ancaq Rusiyanın bu kontaktlardan əsas məqsədi Azərbaycan, Ermənistan və Rusiya arasında 2020-2022-ci illərdə imzalanmış birgə bəyanatları diriltməkdir ki, bu da Rusiyanı bölgədə saxlamağı hədəfləyib. Ancaq bu məsələdə əsas qərarı Ermənistan verməlidir, Azərbaycan deyil.

Ümumilikdə Rusiya öz səhvinin acı nəticəsi ilə qarşı-qarşıya qalıb: Moskva bölgədə sülhə kömək etmək əvəzinə mane olmağa çalışırdı. Amma Azərbaycan və Ermənistan sülh istəyirdi. Fikir və yol ayrılığı burdan yarandı. Nəticədə hər iki respublika sülhə nail olmaq üçün Vaşinqtonun təklifini dəyərləndirməli oldu. Rusiyanın Cənubi Qafqaz siyasəti, bax, beləcə iflasa uğradı. Ancaq Prezident Putin hələ də Lavrovu xarici işlər naziri vəzifəsində saxlayır. Bu yanlışın bir cavabdehi olacaq, ya yox?! Hər halda Moskva axır ki ən azı özünün göz yaşlarına inanmalıdır...

Seyid Əhmədli,

Bizimyol.info