20 ilə yaxındır Azərbaycanda yaşayan və burada böyük tikinti layihələrində fəaliyyət göstərən Türkiyə vətəndaşı Ali Destan cinayət məsuliyyətinə cəlb edilib. İndiyə qədər “Alov Qüllələri”, Bakı Olimpiya Stadionu, Heydər Əliyev adına Bakı Hava Limanı, Heydər Əliyev Mərkəzi və başqa layihələrdə sahə rəisi, anbar müdiri və s. vəzifələrdə işləmiş Ali Destan Füzulidə baş vermiş hadisəyə görə cəzalandırılıb.

Bizimyol.info xəbər verir ki, Füzuli şəhərində Model X şirkəti tərəfindən uşaq bağçası inşa olunur. Ali Destan da orada mülki tikinti/hidravlika üzrə mühəndis vəzifəsində işləyir.

Binanın ikinci mərtəbəsində tikintidə çalışan fəhlələrdən biri – Əli təmizlik işləri apararkən ayağı havalandırma üçün nəzərdə tutulmuş boşluğun üstündəki taxtaya toxunub. Taxta sürüşüb və fəhlə həmin boşluqdan birinci mərtəbəyə yıxılıb. Fəhlə ciddi xəsarət alıb.

Bu hadisə ilə əlaqədar 54 yaşlı Ali Destan cinayət məsuliyyətinə cəlb edilib. Həbs edilməsə də, ona qarşı Cinayət Məcəlləsinin 222-ci (tikinti, mədən işlərinin və sair işlərin aparılmasının təhlükəsizlik qaydalarını pozma) maddəsi ilə ittiham irəli sürülüb. O, özünü təqsirli bilmir. Deyir ki, işlədiyi şirkət subpodratçı kimi sifarişçi olan “Lukoil” şirkəti ilə bağlanmış müqavilə əsasında Füzuli şəhərində 2 mərtəbəli uşaq bağçasının tikintisi ilə məşğuldur.

Şirkətin mühəndisi texniki təhlükəsizlik və əməyin mühafizəsi qaydaları üzrə təlimat keçib. Özü də mütəmadi bütün fəhlələrin yanına gedib, onların hansı qaydada işi görməsi ilə maraqlanıb. O, hesab edir ki, Əlinin sürüşüb havalandırma üçün nəzərdə tutularaq tikilməmiş döşəmə boşluğundan yıxılması inandırıcı deyil. Onun sözlərinə görə, arakəsmə olduğuna görə Əlinin ayaqlarını tam görməsə də, yerə əyildiyini görüb. Təxminən bir neçə saniyə sonra isə yıxılmasının səsini eşidib. Hesab edir ki, Əli taxtanı götürdüyü yerdən yıxılıb.

Zərərçəkmiş ondan şikayətçi olmayıb.

Məhkəmə ona qazancının 10 faizi dövlət nəfinə tutulmaqla, 1 il islah işləri cəzası verib.