Yay mövsümündə yerli istehsal hesabına bazarlarda tərəvəz və meyvələr bol, qiymətlər isə ucuz olur.

Amma payızda məhsulların azalması və hava şəraiti təsiri ilə bəzi tərəvəz və meyvələrin qiymətlərində artım olur.

Bəs payızda bazarlarda bizi nələr gözləyir?

Mövzu ilə bağlı “Cebheinfo.az”-a açıqlama verən iqtisadçı-ekspert Akif Nəsirli bildirib ki, yay mövsümü adətən kənd təsərrüfatı məhsullarının bolluğu ilə seçildiyi üçün, bazarlarda ucuzluq dövrü hesab olunur:

“Xüsusilə meyvə-tərəvəz məhsulları bol olur - pomidor, xiyar, badımcan, qarpız, yemiş, şaftalı, gilas və sair. Nəticədə də qiymətlərin aşağı düşməsinə səbəb olur. Bildirim ki, ötən il olduğu kimi, bu il də yay mövsümündə meyvə-tərəvəzlərinin qiyməti o qədər də ucuz olmadı. Pomidorun qiyməti 1 manatdan yenicə bir qədər aşağı düşüb, qarpız 70 qəpiyə, yemiş isə 1 manata satılır. Amma payızda vəziyyət bir qədər də dəyişə bilər. Sentyabr-oktyabr aylarında hələ də bəzi məhsulların mövsümünün sonu olduğuna görə münasib qiymət müşahidə olunsa da, oktyabrın sonlarından etibarən bəzi məhsullarda bahalaşma başlaya bilər”.

Onun sözlərinə görə, mövsüm bitdikcə tərəvəz və meyvələrin qiyməti arta bilər:

“Açıq sahə məhsullarının mövsümü başa çatdıqca xiyar, pomidor, bibər və s. tərəvəzlər ya istixanalardan, ya da idxaldan gələcək. Bu da qiymət artımına səbəb olacaq. Badımcan, lobya, yaşıl noxud mövsüm sonlandıqca bazarda azlıq təşkil edəcək və qiymətlər arta bilər. Kartof və soğan gəldikdə, əgər məhsul yığımında azalma və ya ixrac artımı olarsa, bu iki əsas məhsulun da qiymətində artım mümkündür. Alma, armud və heyva mövsümün əvvəlində ucuz olsa da, saxlama xərcləri və tələbat artdıqca qiymət tədricən qalxa bilər”.

Ekspert qeyd edib ki, çörək məhsulları bahalaşa bilər, amma payızın mövsümi tərəvəz və meyvələri ucuz qalacaq:

“Çörək və un məhsullarının qlobal buğda bazarındakı dalğalanmalar, enerji qiymətləri və daşınma xərcləri ilə əlaqədar bahalaşma riski var.
Nisbətən qiymətləri sabit və ya ucuz ola biləcək məhsullara nar, üzüm və heyvani aid etmək olar. Bunlar payızın əsas mövsüm məhsullarıdır. Bolluq dövründə qiymətləri münasib qalacaq.

Kələm, kök və çuğundur mövsümün ortasında və sonlarında bol yığıldığı üçün qiymətlər nisbətən stabil qalacaq. Payızın əvvəlində mövsümi məhsulları toplu şəkildə alıb, konservləşdirmək və ya dondurmaq qənaət baxımından faydalıdır. Anbar və saxlama şəraiti olanlar üçün kartof, soğan, alma kimi məhsulları erkən alıb saxlamaq sərfəli ola bilər”.