Gürcüstan Prezidenti Mixail Kavelaşvili türkiyəli həmkarı Rəcəb Tayyib Ərdoğanla birlikdə keçirdiyi mətbuat konfransında deyib ki, rəsmi Tbilisi Azərbaycanla Ermənistan arasında münasibətlərin normallaşmasına töhfə verməyə davam edəcək.
O bildirib ki, Cənubi Qafqazda sabitlik rəsmi Tbilisi üçün vacibdir.
Kavelaşvili Azərbaycanla Ermənistan arasında normallaşma prosesini dəstəklədiklərini bildirib.

Əvvəl də dediyimiz kimi, avqustun 8-də ABŞ-də Azərbaycanla Ermənistan arasında əldə olunan razılıqlar regionda tamamilə yeni reallıqlar yaratdı. Bu, Gürcüstanın maraqlarına cavab verir.

Birincisi, ona görə ki, Cənubi Qafqazda sülh və sabitliyin təmin olunması bir region ölkəsi kimki Gürcüstanın da maraqlarına uyğundur. Sözsüz ki, bundan sonra bölgədə əməkdaşlıq üçün yeni imkanlar yaranacaq. Rəsmi Tbilisi də bu fürsətlərdən istifadə edəcək.
Gürcüstan həmişə mümkün qədər çalışıb ki, Azərbaycan və Ermənistan arasında balanslı davransın. Bu, tamamilə normal və məntiqlidir. Odur ki, iki qonşusu arasında münasibətlərin bərpası Gürcüstanın marağındadır.

İkinci bir tərəfdən, Vaşinqtonda imzalanan sazişlə ABŞ-nin Cənubi Qafqazdakı təsir imkanları xeyli artdı. Eyni zamanda Rusiya “rıçakları” azaldı. Bu, rəsmi Tbilisiyə Qərbə inteqrasiyanı sürətləndirmək üçün fürsətdir.

Gürcüstan regiondakı vəziyyətdən istifadə edərək gələcəkdə Rusiyanın təsirindən tam çıxa və güclənə bilər. Bu isə rəsmi Tbilisiyə özünün ərazi bütövlüyü uğrunda mübarizəyə başlamaq üçün şərait yarada bilər.
Beləliklə, Cənubi Qafqazın hər üç dövləti- Azərbaycan, Gürcüstan və Ermənistan Rusiyanın bölgəyə təsir imkanlarını minimum endirirlər. Bu isə o deməkdir ki, bölgədə “oyun qaydaları” dəyişir.

Siyasi şərhçi Kənan Novruzov,

 Sitat.info