"Nikol Paşinyan hökumətinin hazırkı xarici siyasətinin Ermənistan üçün ciddi nəticələri olacaq". Bunu Ermənistanın sabiq Prezidenti Robert Köçəryan deyib. Onun iddiasına görə, Avropa İttifaqı (Aİ) Ermənistandan Ukrayna kimi Rusiyaya qarşı istifadə etməyə çalışır: "İndiki vəziyyətdə bir məqsəd var: Ukrayna və Ermənistan vasitəsilə Rusiyaya zərər vermək, ya da başqa ölkə tapıb onun vasitəsilə ona zərər vurmağa çalışmaq. Bu, strategiya deyil, başqasının əlində alət olmaqdır. 

Bizim istədiyimiz budur? Mənə deyə bilərsinizmi ki, bu gün Ermənistan hansı xarici siyasət yürüdür? Mən başa düşməyə çalışıram və başa düşmürəm. Bu, siyasət deyil, ciddi nəticələrə gətirib çıxaran biabırçılıqdır. Buna görə də (Rusiyadan) gözlədiyimiz dəstəyi ala bilmədik". Köçəryan bildirib ki, Ermənistan Rusiya ilə münasibətləri bərpa etməlidir. Onun sözlərinə görə, dünya təkqütblü sistemdən çoxqütblü quruluşa keçir və bu keçid dövrü qeyri-sabitliklə müşayiət olunur, bu baxımdan Ermənistan üçün də təhdidlərin sayı artır: “Risklər var və onlar hələ də neytrallaşdırılmayıb. Türkiyə nə edir? Türkiyə türkdilli ölkələri öz liderliyi altında birləşdirməyə çalışır. Hətta ortaq hərbi qüvvələrdən belə danışılır. Bu, Ermənistan üçün təhlükə deyilmi? Əlbəttə ki, təhlükədir. Türkiyədən gələn təhdid qalır, onların məqsədi aydındır. Biz Türkiyənin nail olmaq istədiyi böyük siyasi mənzərədə yad bir cisimik. Bu, onların milli maraqlarıdır, biz onları buna görə günahlandıra bilmərik. Ancaq gəlin anlayaq: bu bölgədə Türkiyəni kim cilovlaya bilər? Mənə bir ölkənin adını deyin". Son günlərdə Ermənistanın daxili siyasi mühitində Rusiyanın 5-ci kolonu olan qüvvələrin fəallaşması müşahidə edilir. Məlumdur ki, Rusiyada Ermənistan üzrə kuratoru Putinin daxili siyasi məsələlər üzrə rəhbəri Sergey Kiriyenko təyin edilib. Əslində, bu, təyinatın özü Kremldə Ermənistana sırf forpost kimi baxıldığını, İrəvanı müstəqil hesab etmədiyini göstərir. Köçəryanın geniş müsahibəsi və həmin müsahibədə onun "Ermənistanın yeganə xilaskarının Rusiya olmasını" deməsi bu qüvvələrin kimə xidmət etməsini açıq nümayiş etdirir. R.Köçəryanın agent olması, vaxtilə Qarabağda separatçı hərəkatın məhz SSRİ DTK-nın xətti ilə başlaması da sirr deyil. Qarabağda Köçəryanın fəaliyyətinin məqsədi azərbaycanlılara qarşı geniş nifrətin, azərbaycanofobiyanın yayılması olub. “Krunk” təşkilatının üzvü olaraq o, Qarabağda ermənilər arasında etnik nifrəti təbliğ edib. Faktiki münaqişənin başlamasının əsas səbəbkarlarından olub. Görünür, Köçəryan hesab edir ki, onun aktiv fəaliyyəti ilə Rusiya regionda 2020-ci ildən sonra yaranmış yeni status-kvo-nu dəyişəcək. Lakin bu, mümkün deyil. Köçəryanın yolu Bakı Məhkəməsində aparılan ədalət mühakiməsindən keçir. Onun başqa siyasi perspektivləri yoxdur.

"Atlas" Araşdırmalar Mərkəzinin rəhbəri Elxan Şahinoğlu "Sherg.az"adeyib ki, Ermənistanın keçmiş Prezidenti Robert Köçəryan il ərzində ən azı iki dəfə ya mətbuat konfransı keçirir, ya da müxtəlif mövzularda açıqlamalar verir. Ekspert vurğulayıb ki, R.Köçəryanın budəfəki açıqlamaları Baş nazir Nikol Paşinyanın ona qarşı sərt tənqidləri ilə bağlıdır: 

"Nikol Paşinyan Köçəryanı və onun siyasətini parlamentdəki çıxışında sərt tənqid etmiş, keçmiş prezidentə və onun tərəfdarlarına “əsəblərimlə oynayamın, sizi tapdalayaram” kimi mesaj göndərmişdi. Bu sözlər Köçəryana bərk toxunduğuna görə, o, əvvəlcə deputat oğlu Levonu qabağa verib, ürəyi soyumayıb özü də baş nazirin əleyhinə açıqlamalar səsləndirib. Robert Köçəryanın dediyi odur ki, Paşinyanın xarici siyasəti yanlışdır, Avropanın yerinə yenidən Rusiyaya sığınmaq lazımdır. Əslində, Köçəryanın bu sözləri Paşinyandan çox Kremlə ünvanlanıb. Keçmiş prezident Kremlə demək istəyib ki, “sizin Ermənistandakı adamınız əvvəlkitək mənəm, dəstəyiniz artırın, Paşinyanı yıxım”. Köçəryan Paşinyanın 9 mayda Moskvada Putinlə birgə hərbi paradda iştirakından böyük nəticə çıxarmağın əleyhinədir. Onun fikrincə, Paşinyan 9 maydan sonra yenə Fransa Prezidenti Emmanuel Makronla qucaqlaşıb".

Analitik hesab edir ki, Kreml Köçəryana o halda üstünlük verəcək ki, o, siyasi gücünü və reytinqini artıra bilsin:

 "Çünki Kreml Ermənistanda güclü fiqura, seçkidə Paşinyanı yenə biləcək siyasətçiyə üstünlük vermək istəyir. Putin Köçəryanla dostluğundan imtina etməsə də, keçmiş prezidenti Paşinyanı üstələyəcək fiqur saymır. Ona görə də, Kreml hələ ki, Paşinyanla yola davam edəcək. Paşinyan da bunu anladığından Kremli narahat edəcək açıqlama və addımlardan uzaqlaşmağa başlayıb".