Erməni revanşistlər və onların havadarları Azərbaycanın öz ərazi bütövlüyü və suverenliyini bərpa eləməsini, işğalçını layiqincə cəzalandırmasını hələ də həzm edə bilmirlər. Hərbi Zəfərimizdən sonra Qərbdən ölkəmizə artan təzyiqlər, qəbul edilən çoxsaylı qərəzli, böhtan dolu qərar və qətnamələr buna şübhə yeri qoymur.
Məkrli çevrələr, Türk düşmənləri həm ermənilərin əli ilə, həm də özləri Azərbaycana zərbə vurmaq üçün ən müxtəlif planlar qurmağa, ssenarilər hazırlamağa çalışırlar. Hədəflərdən biri də xüsusən də gəclərin beynini zəhərləmək, daxili birlik və həmrəyliyimiz sarsıtmaqdır. Təsadüfi deyil ki, bu məsələyə Prezident İlham Əliyev bir neçə dəfə diqqət çəkib.
“Uzun illər ərzində Ermənistan-Azərbaycan münaqişəsi xarici qüvvələrin regiona təsir göstərməsi üçün əsas alət olub. Lakin bu gün aydındır ki, keçmiş münaqişə idarəetmə vasitəsi kimi öz əhəmiyyətini itirir, çünki Azərbaycan bu mövzunu beynəlxalq gündəmdən çıxarmaq üçün ardıcıl strategiyasını həyata keçirir”.
“Yeni Müsavat” xatırladır ki, bunu sabiq xarici işlər naziri, politoloq Tofiq Zülfüqarov deyib. Onun fikrincə, artıq Ermənistan da Nikol Paşinyanın simasında, hələlik yetərli olmasa da, sülh gündəmi üçün son dərəcə zərərli olan “miatsum”, “Böyük Ermənistan” və “1915-ci il soyqırımı” kimi mövzuların bölgəyə təsir aləti kimi istifadə olunmaması üçün müəyyən addımlar atır: “Belə bir anlaşma formalaşır ki, bu mövzular, sadəcə, "siçan tələsindəki pendir" kimidir - cəlbedici görünsə də, Ermənistanın dövlət kimi gələcəyi üçün ciddi təhlükədir. Bəs münaqişə mövzusu xarici qüvvələrin aləti kimi təsirini tamamilə itirərsə, alternativ hansı formada görünəcək?"
Sabiq nazir öz sualına belə cavab verir: “Əslində cavab artıq var - əgər biz "Ərəb baharı" hadisələrinə və ya Şərqi Avropa və postsovet ölkələrində müxtəlif rəng və çalarlarda “məxməri inqilablar” silsiləsinə nəzər salsaq. Azərbaycanda nə ola bilər, münaqişə ilə (Qarabağ - red.) idarəçilik mexanizmini nə ilə əvəz etməyə çalışacaqlar? Sualının cavabı aydındır - daxildən vəziyyəti pozmağa cəhdlər olacaq".
Onun sözlərinə görə, bu məsələdə xalqın narazılığının səbəbi xarici məkrli oyunçular üçün həlledici əhəmiyyət daşımır. “Onlar istənilən bəhanədən - istər real, istərsə də uydurma - istifadə etməyə çalışacaqlar. Axı Liviyada əhalinin yaşayış səviyyəsi digər Afrika ölkələrindən xeyli yüksək idi, lakin informasiya təxribatçılarının hədəfli fəaliyyəti ölkənin dağılmasına və artıq ikinci onillikdir davam edən vətəndaş müharibəsinə səbəb oldu. Demək ki, bizim Qələbəmiz, təəssüf ki, Fukuyamanın dediyi kimi, hələ "tarixin sonu" deyil. Ayıq-sayıq olmamız lazımdır!" - Zülfüqarov xəbərdarlıq edib.
Bəs daxili birliyimizi və sabitliyimizi qorumaq üçün daha nələr edilməlidir - hakimiyyət, cəmiyyət, ziyalılar və media səviyyəsində? İnternet-kommunikasiya əsrində o sırada gənclərimizin təhlükəli “5-ci kolona” çevrilməsinin qarşısını necə almaq olar?
Vətəndaş Həmrəyliyi Partiyasının sədri Sabir Rüstəmxanlı “Yeni Müsavat”a bildirdi ki, əvvəla, Azərbaycanda sabitlik yüksək səviyyədə qorunur. Partiya sədrinin sözlərinə görə, iqtidarla siyasi partiyalar arasında münasibətlər və dialoq var. S.Rüstəmxanlı qeyd etdi ki, amma bu vəziyyətin daha etibarlı olması üçün bəzi qapılar açılmalıdır, vətəndaşlarla rəsmi dairələr arasında əlaqələr xeyli dərəcədə yaxşılaşmalıdır: “Eyni zamanda işsizlik, insanları narahat edən sosial məsələlər, quru sərhədlərin açılması, əhalini narazı salan bir sıra hallar aradan qaldırılmalıdır. Çünki hamı Zəfərimizə sevindi, vətəndaşlar dövlət başçısının yürütdüyü siyasəti bəyənir, amma kiçik məmurlar da vəziyyətdən sui-istifadə edərək qudurğanlığa yol verməməlidirlər. Əksinə, Prezidentin siyasətini dəstəkləməli, xalqa sevgi ilə yanaşmalıdırlar”.
VHP sədri əlavə etdi ki, burada süni surətdə yaradılan narazılıqları, ölkəyə kənardan müdaxilələri nəzərdə tutmur: “Xarici müdaxilələrə qarşı mübarizə aparılmalıdır. Sadəcə, ölkə içindəki neqativ hallar aradan qalxmalıdır. Yəni təkcə çörək, güzəran məsələsi deyil, məsələn, televiziyalardakı səviyyəsiz verilişlər insanların əsəbləri ilə oynayır. Yaxud toy mərasimləri olsun, restoranlar menyunu "od qiymətinə" qoyur. Yaxşı, bəs bu “toy mafiyası”nı kimlər idarə edir? Yəni bütün bunlar bəlkə xırda görünə bilər, amma cəmiyyətdə gərginlik yaradan hallardır. Ona görə də bu məsələlər həllini tapmalıdır ki, cəmiyyətdə narazılıq artmasın və kənar müdaxilələr üçün bəhanə yaranmasın".
S.Rüstəmxanlı vurğuladı ki, bununla belə, bu gün dövlət bir sıra sahələrə dəstək verir, büdcədən vəsaitlər ayrılır, amma həmin maliyyənin şəffaf şəkildə xərclənməməsi ilə bağlı mətbuatda məlumatlar olur: “Bu maliyyənin xərclənməsinə dövlət nəzarəti daha da güclənməlidir. Bundan başqa, dostlarla, qonşularla münasibətlərdə ölçülü-biçili olmaq lazımdır. Misal üçün, yunan Kipri məsələsinə görə dərhal türk respublikalarına hücum edilir ki, "Turan birliyi" dağılacaqmı? Bundan da düşmən qüvvələr, “Moskva aşiqləri” istifadə edirlər. Hesab edirəm ki, bu neqativ halların da qarşısı alınmalıdır".
