Noyabrın 24-də Ağadamda Azərbaycan hərbçiləri tərəfindən vurulan helikopterin “ekipaj üzvləri”nin Ermənistanda dəfn mərasimi keçirildi. “Hürriyyət”in ötən sayında (24-27 noyabr tarixli sayında) dərc olunan “Ermənilər bu gün kimi dəfn edəcək” sərlövhəli yazıda da qeyd etdiyimiz kimi, düşmən tərəfin iddiasına rəğmən, Azərbaycan Müdafiə Nazirliyi vurulan helkopterin ekipaj üzvlərinin hələ də hadisə yerində olduğunu bildirir. Ermənistan rəhbərliyi isə bəyan edir ki, xüsusi əməliyyatla helikopterin vurulduğu yerdən pilotlardan birinin meyitini, digərlərinin bədəninin qalıqlarını və helikopterin “qara qutu”sunu ərazidən çıxarıblar. Hansı ki, Ermənistan telekanlallarının yayımladığı görüntülərdə də bir nəfərin tabutda uzadılmış meyiti əks olunub, digər kadrlarda isə yanmış geyimlər, ekipaj üzvlərinə məxsus paraşüt görünür…
Azərbaycan Müdafiə Nazirliyi hesab edir ki, məlum cənazə törəni Ermənistan rəhbərliyinin daxili auditoriyaya hesablanmış siyasi şousundan başqa bir şey deyil. Müdafiə Nazirliyinin açıqlamasında hərbi mütəxəssislərin rəyinə istinadən vurğulanır ki, “Mi-24” döyüş helikopterinin partlamasından və yerə çırpılmasından sonra oradakı cəsədlərin heç bir cəhətdən ictimaiyyətə göstəriləsi halda olması mümkün deyil: “11 ton çəkisi olan, saatda 250 km sürətlə yerə çırpılan helikopterdən düşən cəsədin də videoda təqdim olunan formada qalması qeyri-mümkündür. Aviasiya mütəxəssislərinin fikrinə görə, texniki baxımdan “İqla” daşınan zenit raket kompleksi ilə vurulduqdan sonra baş verən partlayış nəticəsində cəmi 3-4 saniyə yanaraq yerə düşən və zərbədən tam dağılan “Mi-24” helikopterin ekipajının katapult edə bilməsi, yəni paraşütlə tullanması, paraşütün isə ermənilərin təqdim etdiyi formada qalması mümkün deyil”. Azərbaycan Müdafiə Nazirliyinə görə, təqdim edilən videogörüntülər montaj işidir və helikopter hadisəsi ilə bağlılığı yoxdur.
Kim yalan danışır: Ermənistan, yoxsa Azərbaycan rəhbərliyi?
Məlumat üçün bildirək ki, hazırda istər Azərbaycan, istər də Ermənistan cəmiyyətində vurulan helkiopterin ekipaj üzvləri ilə bağlı yayılan məlumatlar ciddi çaşqınlığa səbəb olub. Belə ki, Ermənistan rəhbərliyinin böyük çoşqu ilə helikopterdə ölən ermənilərə “dəfn mərasimi” təşkil etməsinə baxmayaraq, Azərbaycanın cəsədlərin hələ də hadisə yerində olduğunu iddia etməsi beyinləri xeyli dumanlandırıb. Təsadüfi deyil ki, Ermənistanın müxalif dairələri Sarkisyan hakimiyyətini xalqa yalan məlumat verməkdə ittiham etdiyi bir ərəfədə, Azərbaycanda da Müdafiə Nazirliyinin bəyanatına şübhə ilə yanaşanlar yox deyil…
“Cəmiyyətə söz deyil, fakt lazımdır”
Adının çəkilməsini istəməyən ekspert “Hürriyyət”in əməkdaşı ilə söhbətində bildirdi ki, Azərbaycan Müdafiə Nazirliyi helkopterin vurulması nəticəsində ölən ekipaj üzvlərinin cəsədlərinin hadisə yerində olduğunu cəmiyyətə sübut etməlidir: “Azərbaycan Müdafiə Nazirliyi Ermənistan hakimiyyətinin xalqa yalan məlumat verdiyini, erməni cəsədlərinin hələ də helikopter düşən ərazidə olduğunu iddia edirsə, bunu sübut etməlidir. İstər Azərbaycan, istər də Ermənistan cəmiyyətinə söz deyil, fakt lazımdır. Əlsində, bu hadisə Ermənistan rəhbərliyinin yalanını ifşa etmək üçün Azərbaycan tərəfin əlinə düşmüş önəmli fürsətdir. O cümlədən, artıq Azərbaycan ictimaiyyətində də ermənilərin helikopterdə ölən hərbçilərin cəsədini və helikopterin “qara qutu”sunu çox asanlıqla bizdən ala bildikləri haqda fikirlər formalaşır. Azərbaycan Müdafiə Nazirliyi bu şübhələri ortadan qaldırmaq üçün bu və digər yollarla ekipaj üzvlərinin cəsədlərini ələ keçirməli, onları hər iki ölkənin – Azərbaycan və Ermənistanın ictimaiyyətinə nümayiş etdirməli və haqlı olduğunu sübut etməlidir”.
“Helikopterdə ölən ermənilər Azərbaycanda dəfn edilsin”
Yeri gəlmişkən, Azərbaycan Milli Məclisinin Təhlükəsizlik və müdafiə məsələləri komitəsinin üzvü, YAP-çı deputat Aydın Mirzəzadə də şəxsi facebook səhifəsində dolayısı ilə bu məsələni gündəmə gətirib. A.Mirzəzadə hesab edir ki, Ermənistan öz hərbçilərinə sahib çıxmaq istəmirsə, həmin ermənilərin nəşi hadisə yerindən götürülərək xristian adəti ilə Azərbaycan ərazisində dəfn edilməlidir: “Helikpoterin vurulması Ermənistanın Azərbaycana qarşı qəsbkarlığını təsdiq etməklə yanaşı, düşmən ölkənin zəifliyini açıq-aydın biruzə verir. Ermənistan normal qonşuluq münasibətləri qura bilmədiyi kimi, öz əsgərinə sahib durmağı da bacarmır. İrəvan bu gün hərbçilərinin meyitini götürmək üçün heç bir təşəbbüs göstərmir, bunun üçün müvafiq addımlar atmır. Dünən isə (bir neçə gün öncə – red.) Ermənistan guya əməliyyat keçirərək, hərbi pilotlarının birinin meyitini və onun paraşütünü götürdüyünü elan etdi. Ancaq nümayiş etdirilən kadrlarda yanan hərbi texnikadan guya salamat insan bədəni və zərər dəyməmiş paraşüt nümayiş etdirilir…
Dümən olsalar da, helikopterdə həlak olanlar insandırlar və onların da normal torpağa tapşırılmaq hüququ var. Ermənistanın öz əsgərinə sahib çıxmaq istəməməsini nəzərə alaraq, onların nəşinin götürülərək xristian adəti ilə Azərbaycan ərazisində dəfn edilməsini təklif edirəm. Bu işə Azərbaycanda fəaliyyət göstərən xristian icmalarının din xadimlərini cəlb etmək olar”.
Millət vəkilinin çağırışına nə kimi reaksiya veriləcək?
Əlbəttə, biz Aydın Mirzəzadənin Azərbaycan Müdafiə Nazirliyinin açıqlamasına şübhə ilə yanaşdığını iddia etmək fikrində deyilik. Lakin bu faktın özü də göstərir ki, cəmiyyətdəki şübhələrin aradan qaldırılması, eyni zamanda Sərkisyan hakimiyyətinin yalanını ifşa etmək üçün vurulan helikopterin ekipaj üzvlərinin götürlməsini istəyənlər Azərbaycanda da az deyil. Çünki bu gün çoxlarına qəribə gəlir ki, Ermənistan helikopterinin vurulması nəticəsdində ölən ermənilərin valideynləri Sərkisyan hakimiyyətinin maraqları naminə öz övladlarının cəsədlərinin Azərbaycan tərəfdə qalması ilə barışıb. Axı, helikopterin vurulması nəticəsində cəsədlər nə qədər tanınmaz hala düşsə də, tabutda öz övladının cənazəsi olduğuna inanmayan valideyn hakimiyyətin hazırladığı siyasi şouaya necə qatıla bilərdi?! Digər tərəfdən, bəzi mütəxəssislər helikopterin vurulması nəticəsində baş verən partlayış zamanı ekipaj üzvlərinin hər üçünün tamamilə yanma ehtimalını istisna edirlər. Onların fikrincə, əgər helikopter göydə parçalanıbsa, böyük ehtimalla, cəsədlərdən ən azı biri bütöv yanmaqdan xilas olub. Bununla yanaşı, əgər Ermənistan telekanalları meyitlərdən birinin sadəcə üzünü bağlayıbsa, deməli, həmin erməninin kimliyi bəllidir. Bu səbəbdən, sözügedən hərbçinin valideyni onun helikopterin ekipaj üzvlərindən biri, yəni öz övladları olmadığını bildiyi halda hakimiyyətin yalanı qarşısında necə susqunluq nümayiş etdirə bilər?!
Odur ki, bu və digər çoxsaylı suallara cavab tapılması və cəmiyyətdə mövcud olan şübhələrə son qoyulması üçün Müdafiə Nazirliyi ortaya ciddi fakt qoymalıdır. Zənnimizcə, nə qədər ki, erməni hərbçilərin meyiti hadisə yerində qalacaq, cəmiyyətdə şübhələr get-gedə daha da artacaq. Digər tərəfdən, bu faktın özü Azərbaycan Milli Ordusunun qüdrətini bir daha hər kəsə təsdiqləmiş olar…
“Hürriyyət”
