Əgər Skywell, Kaiyi, Haima, Lifan, JAC, Zotye kimi bazarda az tanınan Çin modelləri almağı düşünürsünüzsə, öncədən daha dərindən araşdırın. Çin avtomobillərinin içərisində özünü təsdiq etmiş markalar bazarda yerini möhkəmlətsə də yeni modellər sadəcə görünüşünə görə könlünüzcə ola bilər. Hər hansı qəza və ya texniki nasazlıqdan sonra ustaların qapısında qalıb, aylarla da detal gözləməli olacaqsıznız.

Maraqlıdır ki, artıq belə avtomobillərin cazibəsinə düşüb almış şəxslərin bildirdiyinə görə, konkret detallar üçün zavoda yazılsa da, oradan da neqativ cavablar alırlar.

Qeyd edək ki, buna qədər də Changan, BYD, Haval kimi artıq özünü təsdiqləmiş markalarla bağlı problemlər olsa da, artıq bazarda çoxluq təşkil etməsi ilə istər usta, istər də ehtiyat hissələri olaraq kifayət qədər əlçatandır.

Avtomobil ustaları bildirilər ki, az tanınan Çin avtomobilləri üçün hazırda yalnız bəzi materiallar mövcuddur: filtrlər, alışdırma şamları, əyləc detalları, asma komponentləri, yəni kiçik ehtiyat hissələrini online sifariş verib əldə etmək olur. Amma avtomobil qəzaya düşərsə, məhz ehtiyat hissələrinin yoxluğundan ikinci həyat qazana bilmir.

Ustalar diqqətə çatdırır ki, bu Çin avtomobillərində ən çətin tapılanlar orijinal kuzov hissələri, ötürücü qutu komponentləri olur. Məsələn, Lifan və ya Zotye üçün bamperlər, yan qanadlar, radiator barmaqlıqları, orijinal faralar, elektrik ötürücüləri, idarəetmə blokları tapılmır. Hazırda hətta sifarişlə də tapılmadığına görə, digər modellərdən ekvivalentlərini tapmağa çalışırlar. Bəzi JAC modellərinin əyləc hissələri üçün Toyota detallarından, Zotye üçünsə Volkswagen avtomobillərindən komponentlər seçilir.

Bizim.Media