Yaxın Şərqdə hərbi gərginliyin pik həddə çatması və ABŞ Prezidenti Donald Trampın Tehran rejiminə qarşı sərt bəyanatları qlobal enerji bazarlarına ciddi təsir göstərib. Dünyanın əsas neft birjalarında qiymətlər qəfildən sıçrayış edib.
Musavat.com xəbər verir ki, Donald Trampın İrana "çox sərt" zərbə endirəcəyi ilə bağlı hədələrindən dərhal sonra neft qiymətləri kəskin şəkildə yüksəlib. Son rəsmi birja əməliyyatlarının nəticələrinə əsasən, Londonun ICE birjasında "Brent" markalı neftin fyuçersləri 2,63 dollar, yəni rəsmən 2,8% dəyər qazanaraq barrel üçün 94,06 dollara yüksəlib.
Eyni zamanda, ABŞ-nin "West Texas Intermediate" (WTI) markalı yüngül xam neftinin qiyməti də analoji sıçrayış nümayiş etdirib. Nyu-York birjasında WTI markalı neftin bir barreli 2,93 dollar (3,3%) bahalaşaraq 91,12 dollara bərabər olub. Analitiklər vurğulayırlar ki, ABŞ-ın Oman körfəzində tətbiq etdiyi dəniz blokadası və tərəflərin qarşılıqlı hərbi zərbələri fonunda Trampın bu son ritorikası qlobal neft tədarükündə ciddi qırılmalar yarada biləcəyi qorxusunu artırıb və bu da birjalarda qiymətlərin sürətlə artmasını stimullaşdırıb.
