Nizami Rayon Məhkəməsində xuliqanlıqda təqsirləndirilən Taryel Quliyevin (adı, soyadı şərtidir) cinayət işi üzrə məhkəmə istintaqı yekunlaşıb.

Pravda.az-ın əldə etdiyi məlumata görə, hakim Mətanət Hacıyevanın sədrliyi ilə keçirilən prosesdə hökm oxunub.

Məhkəmənin hökmü ilə o, 2 il müddətinə azadlıqdan məhrum edilib.

İttihama görə, Taryel Quliyev zərərçəkmiş Yamin Nəbiyev (adı, soyadı şərtidir) arasında mövcud olan 3100 manat məbləğində borcun qaytarılmaması səbəbindən telefon danışığı zamanı mübahisə yaranıb. Sonradan tərəflər arasında görüş keçirilməsi və borcun qaytarılması ilə bağlı razılıq əldə olunub.

Müəyyən edilib ki, təqsirləndirilən şəxs görüşə gedərkən atasının adına qeydiyyatda olan qoşa lüləli ov tüfəngini özü ilə götürüb.

Hadisə 2025-ci ildə axşam saatlarında yaşayış məntəqəsində yerləşən ictimai ərazidə baş verib. İstintaqın gəldiyi nəticəyə görə, Taryel Quliyev Yaminlə görüş zamanı şəxsi münasibətlər zəminində yaranmış narazılığı zorakı şəkildə həll etməyə çalışıb. O, ictimai qaydanı kobud surətdə pozaraq, ətrafdakı şəxslərin narahatlığına səbəb olan hərəkətlər edib və üzərində gətirdiyi ov tüfəngindən istifadə edib.

Materiallara əsasən, təqsirləndirilən şəxs içərisində iki patron olan ov tüfəngi ilə təxminən 5-6 metr məsafədən zərərçəkmiş şəxsin aşağı ətraflarına istiqamətlənərək bir dəfə atəş açıb. Atəş nəticəsində zərərçəkmiş şəxs müxtəlif nahiyələrdən çoxsaylı qırma yaraları alıb.

İttihamda qeyd olunub ki, Taryel Quliyev bu hərəkətləri ilə zor tətbiq olunması və silahdan istifadə ilə müşayiət edilən, ictimai qaydanı kobud surətdə pozan qərəzli hərəkətlər törədərək xuliqanlıq cinayəti törədib.

Məhkəmə baxışı zamanı Taryel Quliyev ona elan olunmuş ittiham üzrə özünü qismən təqsirli bilib. O, ifadəsində hadisənin ittiham aktında göstərilən qaydada baş verdiyini, ibtidai istintaq zamanı verdiyi ifadələri təsdiq etdiyini söyləyib.

Təqsirləndirilən şəxs törətdiyi əməldən peşman olduğunu, zərərçəkmiş şəxsə dəymiş ziyanın tam ödənildiyini və hadisədən sonra könüllü şəkildə hüquq-mühafizə orqanlarına təslim olduğunu qeyd edib. O, həmçinin himayəsində azyaşlı övladının olduğunu vurğulayaraq, məhkəmədən barəsində ədalətli qərar qəbul edilməsini xahiş edib.

Cinayət işi üzrə məhkəmə araşdırması zamanı tərəflərin ifadələri, ekspertiza rəyləri və digər sübutlar tədqiq olunub. Təqsirləndirilən şəxsə qarşı Cinayət Məcəlləsinin 221.3-cü maddəsi ilə, yəni silahdan istifadə edilməklə törədilmiş xuliqanlıq əməli üzrə ittiham irəli sürülüb.