Astarada anasını qətlə yetirməkdə təqsirləndirilən Murad Kazımzadənin cinayət işinin bəzi detalları məlum olub.

Pravda.az-ın etdiyi məlumata görə, hakim Ənnağı Məmmədlinin sədrliyi ilə keçirilən prosesdə ittiham aktı elan olunub.

İttiham aktına əsasən, hadisə 22 avqust 2025-ci il tarixdə Astara rayonu ərazisində baş verib.

Belə ki, həmin gün narkotik vasitə və psixotrop maddələrin təsiri altında olan Murad Kazımzadə yaşadığı evin mətbəxində anası Məhəbbət Qasımova ilə birlikdə olub. Təqsirləndirilən şəxs son dövrlər anasının ona qarşı laqeyd münasibət göstərdiyini, onu övladı kimi qəbul etmədiyini, qayğısına qalmadığını düşündüyü üçün qadına münasibətlərinin gərginləşdiyini bildirib.

Hadisə günü ailə üzvləri günorta yeməyinə hazırlaşarkən Muradla anası arasında növbəti mübahisə yaranıb. Mətbəxdə təqsirləndirilən şəxsin nənəsi və babası da olub. Murad yemək istədiyini bildirsə də, Məhəbbət Qasımovanın buna kinayəli cavab verdiyini düşünərək əsəbiləşib. Daha sonra mətbəxdə olan bıçağı götürərək anasına ardıcıl zərbələr endirib.

İstintaq materiallarına görə, Murad anasına sinə nahiyəsindən üç dəfə bıçaq zərbəsi vurub. Nəticədə zərərçəkmiş şəxsə ürək, ürək kisəsi və sol ağciyərin zədələnməsi ilə müşayiət olunan ağır xəsarətlər yetirilib. Məhkəmə-tibbi ekspertizasının rəyinə əsasən, həmin xəsarətlər güclü daxili və xarici qanaxmaya səbəb olub və zərərçəkmiş şəxsin ölümünə gətirib çıxarıb.

İttihamda qeyd olunur ki, hadisə anı Məhəbbət Qasımovanın valideynləri – təqsirləndirilən şəxsin babası və nənəsi də mətbəxdə olublar və baş verənləri görüblər. İstintaq hesab edir ki, təqsirləndirilən şəxs anasına yaxın qohumlarının gözü qarşısında xüsusi qəddarlıq nümayiş etdirməklə hücum edib və ona xüsusi əzab verib.

Hadisədən dərhal sonra Murad əvvəlcə hadisə yerindən qaçmağa cəhd göstərib. O, evdən çıxaraq gizlənmək məqsədilə qamışlıq əraziyə gedib, daha sonra qohumlarının yaşadığı evə baş çəkib. Sonradan polis əməkdaşları tərəfindən saxlanılaraq istintaqa təhvil verilib.

Məhkəmə iclasında Murad Kazımzadə ona Cinayət Məcəlləsinin 120.2.2 və 120.2.4-cü maddələri ilə verilmiş ittiham üzrə özünü təqsirli bilib. O, məhkəmədə ifadə verməkdən imtina etsə də, ibtidai istintaq zamanı verdiyi ifadələr elan olunaraq tədqiq edilib.

İstintaq zamanı verdiyi ifadəsində təqsirləndirilən şəxs bildirib ki, Məhəbbət Qasımova ilə münasibətləri uzun müddətdir gərgin olub. Onun sözlərinə görə, anası ona qarşı laqeyd davranır, qayğı göstərmir və tez-tez kinayəli ifadələr işlədirdi. Hadisə günü də anasının növbəti dəfə ona qarşı istehzalı münasibət göstərməsi onda qəzəb yaradıb və nəticədə əlində olan bıçaqla ona zərbələr endirib.

Murad hadisədən sonra bir müddət anasına kömək etmək istədiyini, lakin daha sonra fikrindən daşınaraq qaçdığını bildirib. O, sonradan polis tərəfindən saxlanıldığını və törətdiyi əmələ görə məsuliyyətə cəlb olunduğunu qeyd edib.

Məhkəmədə ifadəsi elan olunduqdan sonra sualları cavablandıran Murad ibtidai istintaq zamanı verdiyi ifadələrin onun sözləri ilə yazıldığını təsdiqləyib. O, hadisədən təxminən 10-15 gün əvvəl narkotik vasitədən istifadə etdiyini söyləyib. Cinayətdə istifadə edilən bıçağı hara atdığını isə xatırlamadığını deyib.

Məhkəmə araşdırmaları zamanı Məhəbbət Qasımova törətdiyi əmələ görə peşman olmadığını da bildirib.

Hökmə əsasən, təqsirləndirilən Murad Kazımzadənin cinayəti sübuta yetirilib. Ona qarşı irəli sürülmüş Cinayət Məcəlləsinin 120.2.2-ci maddəsi (xuliqanlıq niyyəti ilə adam öldürmə) ittihamdan xaric edilib və o, 15 il 6 ay müddətinə azadlıqdan məhrum olunub.