Bakı Ağır Cinayətlər Məhkəməsində qəsdən sağlamlığa ağır zərər vurmada təqsirləndirilən Etibar Pirəliyevin cinayət işi üzrə məhkəmə istintaqı başa çatıb.

Pravda.az-ın əldə etdiyi məlumata görə, hakim Nigar İmanovanın sədrliyi ilə keçirilən prosesdə hökm oxunub.

Məhkəmənin hökmü ilə o, 3 il müddətə azadlıqdan məhrum edilib.

İttihama əsasən, hadisə 2025-ci ilin yanvar ayında gecə saat 02 radələrində Bakı şəhəri, Xətai rayonu ərazisində yerləşən fərdi yaşayış evində baş verib.

Etibar Pirəliyev həmin ünvanda evin mətbəxində tanışı, zərərçəkmiş Georgi Leontyevlə aralarında yaranmış mübahisə zamanı qəsdən ağır bədən xəsarətləri yetirib.

Belə ki, zərərçəkmiş şəxs sərxoş vəziyyətdə olarkən əli ilə sevgilisinin çənə nahiyəsindən vurub. Etibar da buna irad bildirib və tərəflər arasında mübahisə yaranıb. Mübahisə zamanı təqsirləndirilən şəxs mətbəxdə olan masanın üzərindən götürdüyü bıçaqla Georgiyə hücum edib.

Etibar Pirəliyev Georgiy Leontyevin döş və qarın nahiyəsinə iki dəfə bıçaq zərbəsi endirib. Nəticədə zərərçəkmiş şəxs döş qəfəsinin daxilə nüfuz edən kəsilmiş-deşilmiş yarası, qarın ön divarının daxilə nüfuz edən deşilmiş-kəsilmiş yarası, mədənin zədələnməsi ilə müşayiət olunan ağır bədən xəsarətləri alıb. Həmin xəsarətlər həyat üçün təhlükəli olan sağlamlığa ağır zərər kimi qiymətləndirilib.

Məhkəmə iclasında Etibar Pirəliyev ona elan olunmuş ittiham üzrə özünü Cinayət Məcəlləsinin 126.1-ci maddəsi ilə təqsirli bilib və ifadəsində hadisənin başvermə səbəbini şəxsi mübahisə kimi izah edib. O deyib ki, hadisə günü dostunun evində olublar və orada iştirak edən şəxslər arasında mübahisə yaranıb. Zərərçəkmiş şəxs sevgilisinə qarşı kobud davranaraq onu vurub.

Təqsirləndirilən şəxs qeyd edib ki, bu hərəkətə etiraz etdikdən sonra aralarında gərginlik yaranıb və Georgiy Leontyevi yan otağa çağırıb. Orada isə mübahisə davam edib və o, bıçaqla zərərçəkmişə zərbə vurub.

Zərərçəkmiş şəxs isə məhkəmədə fərqli məzmunlu ifadə verərək bildirib ki, hadisə günü birlikdə yemək yeyərkən əvvəlcə sevgilisi ilə mübahisə yaranıb və o, həmin şəxsi vurub. Daha sonra isə təqsirləndirilən şəxsin onu yan otağa çağırdığını və orada qəfil hücuma məruz qaldığını qeyd edib.