Son illər paytaxtın müxtəlif ərazilərində söküntü işləri aparılır.

Həmin ərazilərdə söküntü işlərinin əsas səbəblərindən biri istismara yararsız binaların yeniləri ilə əvəz edilməsidir. Müxtəlif dövlət qurumlarının tapşırığı əsasında həyata keçirlən bəzi söküntü işləri zaman həmin ərazilər abadlaşdırılaraq yeni parklar salınır.

Bununla yanaşı müxtəlif investorlar tərəfindən sökülən binaların yerində yeni, hündürmərtəbəli binalar da inşa edilir.

“Bakı şəhərinin 2040-cı ilədək inkişafına dair Baş planı”na əsasən, 2026-cı ildən etibarən paytaxtın 7 rayonunda (Yasamal, Binəqədi, Nərimanov, Xətai, Nəsimi, Sabunçu, Suraxanı) istismar müddətini başa vuran binalar sökülərək, yerində parklar, yaşıllıq zonaları və yeni yaşayış binaları salınacaq.

Paytaxtın bəzi əraziləri də var ki, onlarda evlərə baxış keçirilib, sakinlərə ödənəcək ilkin qiymətlərlə bağlı məlumat verilib.

Bu baxımdan növbəti söküntü əraziləri "Xutor", "Papanin" deyilən ərazilər ola bilərmi?

Məsələ ilə bağlı Azərbaycan Qiymətləndiricilər Cəmiyyətinin sədri Vüqar Oruc “Cebheinfo.az”-a bildirib ki, əslində “Azərbaycan Respublikasının Qiymətləndirmə Fəaliyyəti haqqında” Qanuna müvafiq olaraq həmin ərazilərdə investorların özlərinin vətəndaşlara hər hansı bir qiymət deməsi düzgün deyil:

“Bunu müvafiq qiymətləndirmə şirkətləri etməlidir. Bu istiqamətdə konkret qiymətlər verilməlidir ki, həmin ərazilərdə söküntülərin və bu binalardakı sakinlərin taleyi investorların ümidinə buraxılmamalıdır.

Yaxud da hər hansı qurum bunu müəyyən etməməlidir. Qanuna görə, qiymətləndirmə şirkətləri həmin ərazidə qiymətləndirmə işi aparmalıdır və kompensasiyanın məbləği barədə qərara gəlməlidirlər. “Xutor” və “Papanin” deyilən ərazilərdə söküntü işlərinə start veriləcək. Ancaq bu müvafiq dövlət qurumunun, Dövlət Şəhərsalma və Arxitektura Komitəsinin müəyyən etdiyi plan üzrə həyata keçirilir.

Həmin plana əsasən, hər hansı bir ərazidə qəzalı binalar varsa, yaxud da “Bakı şəhərinin 2040-cı ilədək inkişafına dair Baş planı”na uyğun olaraq həmin ərazilərdə söküntü işləri aparılıb, abadlıq işləri görüləcəksə, bu prosesi həyata keçirmək üçün ya dövlət büdcəsindən müəyyən vəsait ayrılır, ya dövlət və investor birlikdə bu prosesi həyata keçirir, ya da təkbaşına investor müəyyənləşdirir və müəyyənləşir ki, həmin investor ərazilərdə söküntü işlərinin həyata keçirilməsi üçün proqram təklif etmiş olur”.

Cəmiyyətin sədri vətəndaşlara tövsiyə edir ki, hər hansı bir şəxs, investor onların əmlakları barədə fikir irəli sürəndə bu barədə mütləq qiymətləndirmə rəyi tələb etsinlər:

“Yaxud da vətəndaşlar öz ərazilərində söküntü işləri aparacaq qiymətləndirmə şirkətlərinə hesablama işləri aparmaq üçün sifariş versinlər, onların mülkiyyətinin kompensasiya dəyəri müəyyən olunsun.

Çünki sonradan çox böyük narazılıqlara səbəb olur. Adətən belə hallarda investor maraqlı olur ki, daha az xərci olsun. Çünki çox qazanmaq istəyir və tikintidən sonra satılacaq mənzillərin məhz əvvəlki xərclərinin ödənməsi və kifayət qədər gəlir yaratması üçün vətəndaşa daha az ödəniş etmək istəyir.

Yaxud da elə vətəndaşlarımız da var ki, bütün problemlərinin həllini məhz sökülən evlərdə görürülər. Yəni ev söküləndə yanlız alternativ ev sahəsi əldə etməsinlər, avtomobil alsınlar, başqa problemlərini həll etsinlər.

Belə hadisələr baş verməməsi üçün mütləq arbitr lazımdır. Yəni obyektiv, tərəfsiz mövqe nümayiş etdirən qiymətləndirmə şirkəti burada qiymətləndirmə işini həyata keçirib kompensasiya dəyərini müəyyən etməlidir”.