Nazirlər Kabinetinin yeni qərarı Bakıda taksi fəaliyyəti ilə məşğul olan minlərlə sürücünün gündəmini dəyişib. Qərara əsasən, paytaxt ərazisində taksi minik avtomobilləri ilə sərnişin daşımaları üçün verilən icazələrin əlavələrinin sayı 25 minlə məhdudlaşdırılacaq. Bu addım paytaxtdakı taksi sektorunun tənzimlənməsi və nəqliyyat axınının azaldılması məqsədilə atılsa da, qərarın dərhal ardından icazə almaq üçün ciddi növbələr yaranıb. Sosial şəbəkələrdə yayılan görüntülərdə qeydiyyat mərkəzlərinin qarşısında uzun sıralar, gərginlik və narazı sürücülər müşahidə olunur.
Sürücülərin sözlərinə görə, yeni qaydalar barədə məlumat çox qısa zamanda yayılıb və əksəriyyət sənədləri hazırlamağa belə imkan tapmayıb. Qeydiyyat prosesi məhdud sayda qəbul aparıldığı üçün bəzi sürücülər günlərlə növbədə qalmağa məcbur olur. “Hər kəs tələsir, çünki icazə ala bilməsək, işsiz qalacağıq. Bu qərar qəfil verildi, indi hamı eyni vaxtda sənəd təqdim etmək istəyir”, – deyə sürücülərdən biri bildirib.
Rəsmi məlumatlara görə, bu addım taksi sektorunda keyfiyyət standartlarının artırılması, nəqliyyat sıxlığının azaldılması və qeyri-qanuni fəaliyyət göstərən sürücülərin qarşısını almaq məqsədi daşıyır. Bakı Nəqliyyat Agentliyinin əvvəlki açıqlamalarında qeyd olunurdu ki, paytaxtda fəaliyyət göstərən taksilərin sayı real tələbatdan xeyli çoxdur və bu, həm bazarda rəqabət balansını, həm də şəhər yollarındakı hərəkət sıxlığını pozur.
Nəqliyyat sahəsi üzrə ekspertlər hesab edirlər ki, icazələrin məhdudlaşdırılması qısa müddətdə bazarda gərginlik yarada bilər. Bəzi ekspertlər bunun nəticəsində sərnişindaşıma xidmətlərinin bahalaşacağını, eyni zamanda qeyri-leqal taksilərin sayının arta biləcəyini proqnozlaşdırır.
“Əgər icazə sistemi şəffaf və ardıcıl şəkildə tətbiq olunmasa, insanlar qeyri-qanuni fəaliyyətə yönələcək. Bu da həm dövlətin gəlir itkisinə, həm də təhlükəsizlik risklərinə səbəb ola bilər”, – ekspertlərdən biri qeyd edib.
Nazirlər Kabinetinin yeni qərarı paytaxtın taksi sektoruna ciddi təsir göstərib. İcazələrin 25 minlə məhdudlaşdırılması yaxın aylarda həm sürücülərin, həm də sərnişinlərin davranışına təsir edəcək. Rəsmi qurumlar isə bildirir ki, məqsəd bazarı tənzimləmək, keyfiyyəti artırmaq və nəqliyyatda xaosu aradan qaldırmaqdır.
Bizimyol.info
