“Futbol üzrə Azərbaycan milli komandasının yeni baş məşqçisi Ayxan Abbasov olacaq. Onun təyinatı qısa zamanda rəsmən açıqlanacaq. Ayxan Abbasov çox doğru seçimdir”.

Bu sözləri “Sportinfo TV” və “CBC Sport” telekanalının aparıcı-eksperti, tanınmış idman jurnalisti Elçin Cəfərov “Cebheinfo.az”-a açıqlamasında deyib. O bildirib ki, Azərbaycan futbolu yerli mütəxəssisə tapşırılması düzgün qərardır:

“Bizim çox yüksək səviyyəli futbolçulardan ibarət heyətimiz yoxdur ki, onu dünyaca məşhur baş məşqçiyə tapşıraq. Yəni bizim milliyə dünyanın nüfuzlu mütəxəssisini dəvət etməyə ehtiyac yoxdur. Bizə futbolçularımızın dilini və mentalitetimizi bilən məşqçi lazımdır.

Yerli məşqçi futbolçularımızı daha yaxşı başa düşür və tanıyır. Ayxan Abbasovun ən önəmli xüsusiyyəti odur ki, əlindəki oyunçu qrupuna görə taktika müəyyənləşdirir. Yəni Amerika kəşf etməyə ehtiyac yoxdur”.

Ekspert diqqətə çatdırıb ki, Ayxan Abbasov Qurban Qurbanovdan sonra yığmamızı çalışdıracaq ilk yerli baş məşqçi olacaq:

“2018-ci ildən sonra ilk dəfə millimizin sükanı arxasında azərbaycanlı mütəxəssis dayanacaq. Əslində, uzun illərdir deyirdik ki, millimizi yerli məşqçi çalışdırmalıdır. Axır ki, AFFA da bununla bağlı qərar verdi. Görünür, növbəti Millətlər Liqası dönəmində də Ayxan Abbasovla yola davam edəcəyik. Bu da ən azı 2 illik müqavilə deməkdir. Artıq AFFA rəhbərliyi öz səhvlərini başa düşərək, düzgün addım atdı. Ayxan Abbasovun təyinatı yeni AFFA rəhbərliyinin atdığı ən doğru addımdır”.

Elçin Cəfərov Ayxan Abbasovdan gözləntilər barədə də danışıb:

“Ayxan Abbasovun dönəmində ən azından milli futbolçularımızda mübarizə ruhunu və əzmkarlığı görəcəyik. Üstəlik, Ayxan bəy oyun içərisində fərqli addımlar atacaq potensiala sahibdir. Məncə, yeni baş məşqçimiz ən düzgün seleksiyanı aparacaq. Çünki Ayxan Abbasov çempionatımızı və futbolçularımızı çox gözəl tanıyır.

O, faydalana biləcəyi oyunçuları milliyə dəvət edəcək. Üstəlik, forma ədalətsiz paylanılmayacaq. Hər birimiz Ayxan Abbasovdan ədalətli seçimlər görəcəyik”.

Mütəxəssiz sonda onu da bildirib ki, Ayxan Abbasov “Şamaxı” və milli komandanı eyni vaxtda çalışdıracaq.