“Bakıda ictimai nəqliyyatın necə işləməsi əhalinin vəziyyətinin yaxşılaşması və pisləşməsinin əsas parametri sayılmaqdadır. Bu günlərdə metroda qiymətin qalxması iqtisadi cəhətdən əsaslandırıla bilər.

Başqa yerlərdə imtiyazlı şəxslərin bundan hansı formada yararlanacağı mütləq qeyd olunur. Bizdə isə tələbələrin, şəhid övladlarının, autizmli, daun sindromlu uşaqların hansısa formada daşınacağı, imtiyazlı tələbələrin müəyyən kartlarla təmin olunması məsələsi hələ də problem olaraq qalır”.

Bizim.Media xəbər verir ki, bunu Milli Məclisin deputatı Fazil Mustafa parlamentin payız sessiyasının ilk plenar iclasında çıxışı zamanı deyib.

O bildirib ki, qiymət artımı aşağı təbəqədə müəyyən narazılıqlar yaradır.

Deputat əlavə edib ki, hava limanından daşınma məsələsi böyük problem yaradır:

“Necə ola bilər ki, hava limanına insanlar gəlir, AZAL tərəfindən yaxşı işlər də görülür, amma daşınması məsələsi ölkənin imici üçün problemə çevrilir?!. Alternativ yoxdur, qatar yox, avtobus yox, taksi də yox. Bu şəhərə necə gəlsin? Təsəvvür edin ki, Naxçıvandan yoxsul bir insan 50-60 manat verib Bakıya gəlir və ordan da 30 manat verib mərkəzə gəlir. Bunun ordan Bakıya gəlişi 100 manata başa gəlir. Bir çox ölkədə təqaüdçülərə güzəştlər olunur, çünki təqaüdçünün əlavə gəliri yoxdur. Biz hələ təqaüdçünün adını bu siyahıya salmırıq.

Nəhayət ki, ictimai nəqliyyatın vətəndaşa xidmət edən modelə gətirməsini təmin etməliyik. Ölkə prezidentinin də bu istiqamətdə atdığı addımlar, sərəncamlar var. Bunun doğru icra olunması problemin yaxın zamanlarda həll olunmasını təmin edə bilər”.