Ermənistan mətbuatında son günlər sensasion iddialar tirajlanır.

Musavat.com xəbər verir ki, Factor.am və ona yaxın KİV-lərin məlumatına görə, Ermənistan Dövlət Təhlükəsizlik Komitəsi (DTK) Xarici İşlər Nazirliyinin (XİN) əməkdaşını “Azərbaycanla əməkdaşlıqda” ittiham edərək saxlayıb.

Məlumatlarda həmin şəxsin Aşxen Arakelyan adlı diplomat olduğu bildirilir. İddialara əsasən, onun gizli məlumatlara çıxışı olub, Azərbaycan vətəndaşı ilə romantik münasibətdə olub və bu əlaqələr fonunda məxfi məlumat ötürüb.

Erməni KİV-ləri yazır ki, saxlanılma təxminən bir ay əvvəl, Vyanaya ezamiyyəti zamanı “Zvartos” aeroportunda baş verib. Onlar iddia edirlər ki, dindirmə zamanı o, Azərbaycandan pul aldığını etiraf edib. Tək hərəkət etmədiyini, arxasında başqa şəxslərin də dayandığını söyləyib. DTK bu qalmaqaldan sonra XİN-in bəzi əməkdaşlarının kompüterlərini müsadirə edib.

Məsələ burasındadır ki, Ermənistan rəsmiləri hələlik bu hadisə ilə bağlı heç bir rəsmi açıqlama verməyiblər. Azərbaycan tərəfinin də bu barədə mövqeyi yoxdur. Mütəxəssislər hesab edirlər ki, bu tip məlumatların mətbuata ötürülməsi daha çox erməni cəmiyyətində diqqəti daxili böhranlardan yayındırmaq və günahı “xarici amillərdə” ötürmək məqsədi daşıyır.

Üstəlik, hadisənin “Azərbaycan vətəndaşı ilə romantik əlaqə” kontekstində təqdim olunması da açıq-aşkar manipulyasiya elementidir. Ermənistan cəmiyyətindəki inamsızlıq mühitini dərinləşdirmək üçün Azərbaycan adı bu cür süjetlərdə alətə çevrilir.

Bu, əslində, yeni informasiya müharibəsi üsuludur. Ermənistan mediası öz diplomatik korpusunda yaranan böhranı ört-basdır etmək üçün “Azərbaycanla əlaqə” mövzusunu ortaya atır. Beləliklə, həm daxili auditoriyaya “xəyanətkar” obrazı təqdim olunur, həm də məsuliyyət xarici amillərin üzərinə atılır.

Ekspertlər bildirirlər ki, əgər doğrudan da bu hadisə realdırsa, Ermənistan rəsmiləri bunu rəsmi açıqlama ilə təsdiqləməlidir. Əks halda, yayılan xəbərlər manipulyativ xarakter daşıyır və məqsəd yalnız ictimai rəyə təsir göstərməkdir.