"Ermənistan baş nazirinin Avropa İttifaqının paytaxtı Brüsselə səfəri heç şübhəsiz erməni hökumətinin avrointeqrasiya istiqamətində atdığı növbəti addımdır".
Bunu Qaynarinfo-ya açıqlamasında politoloq Taleh Əliyev Ermənistan baş naziri Nikol Paşinyanın Brüsselə səfərini şərh edərkən deyib.
Taleh Əliyevin sözlərinə görə, görüşün proqramına diqqət edəndə görürük ki, həm yüksək çinli qurum nümayəndələri, həm də həm də Aİ-nin genişlənmə üzrə nümayəndəsilə keçirilən görüş tərəflər arasında əməkdaşlığın dərinləşməsi və genişləndirilməsi mövzusu ətrafında aparılacaq:
"Prosesdən narahat olan tərəf Rusiyadır. Çünki Ermənistan Rusiyanın patronajlığı altında olan qurumlardan mərhələli şəkildə uzaqlaşmaqla eyni zamanda rəsmən Avropa strukturlarına inteqrasiyanı bəyan edib".
Həmsöhbətimizin fikrincə, Ermənistanın mərhələli şəkildə Aİ-yə yaxınlaşması nəzərdə tutulur. Ekspert həm də hesab edir ki, görüşün hazırkı dövrdə keçirilməsi həm də Rusiyaya verilən mesajdır:
"Ermənistandakı Rusiya "5-ci kolon"un aktivləşməsilə Paşinyan hakimiyyətinə qarşı təzyiqlərin artmasına rəğmən mövcud hökumət tutduğu yoldan geri çəkilmir. Əksinə, bu onun avrointeqrasiya istiqamətindəki istək və niyyətlərini daha da stimullaşdırır. Ermənistan daha sürətlə Rusiyadan uzaqlaşacaq".
Qeyd edək ki, Ermənistan baş naziri Nikol Paşinyan iyulun 14-də Brüsselə işgüzar səfərə gedib. Bu barədə Ermənistan KİV-i məlumat yayıb.
Onun Avropa İttifaqı (AI) Şurasının prezidenti Antonio Koşta və Avropa Komissiyasının sədri Ursula fon der Lyayen ilə üçtərəfli görüşü planlaşdırılır. Ermənistan baş naziri həmçinin Aİ-nin genişlənmə məsələləri üzrə komissarı Marta Kos və Belçikanın Baş naziri Bart de Vever ilə görüşəcək.
