Xəbər verdiyimiz kimi, Azərbaycan Prezidenti İlham Əliyev Çin Sədri Si Cinpinin dəvəti ilə bu gün Çinə işgüzar səfərə gedib.

Tiencin şəhərinin Binxay Beynəlxalq Hava Limanında Prezident İlham Əliyevi və birinci xanım Mehriban Əliyevanı Çin hökumətinin yüksək vəzifəli nümayəndələri qarşılayıblar.

Bəs bu səfərdən Azərbaycan üçün gözləntilər nələrdir?

Mövzu ilə bağlı "Cebheinfo.az"-a açıqlamasında Sosial Tədqiqatlar Mərkəzinin departament rəhbəri, beynəlxalq məsələlər üzrə ekspert Əziz Əlibəyli bildirib ki, səfər olduqca ciddi əhəmiyyət daşıyır. O qeyd edib ki, səfərdən Zəngəzur dəhlizi ilə bağlı real addımlar gözlənilir:

“İndiki məqamda bu, çox ciddi bir səfərdir. Ən azından ona görə ki, Rusiya Prezidenti Vladimir Putin də iştirak edəcək. Burada bəzi bir-birinə zidd mövqedə olan Şərq ölkələri də təmsil olunacaq. Mənə elə gəlir ki, proses bizi çox mühüm nəticələrin əldə olunacağı müzakirə masasına aparır.

Ermənistan rəhbərinin də iştirak edəcəyi gözlənilir. Hər halda, Zəngəzur dəhlizi ilə bağlı real addımın atılması mümkündür. Çünki bu yol Çindən başlayaraq Londona qədər uzanmalıdır və buna uyğun qərar qəbul edilə bilər".

Əziz Əlibəyli vurğulayıb ki, görüşün çox ciddi nəticələr verəcəyi gözlənilir:

"Rusiya və Azərbaycan rəhbərlərinin görüşü də istisna olunmur. Ümumilikdə, BRİKS ölkələrinin liderlərinin də Rusiya-Ukrayna müharibəsi kontekstində yekun mövqe müəyyənləşdirməyə ehtiyacı var. Eyni zamanda, Hindistanın başına nə oyun gələcək bu da çox maraqlıdır.

Çünki ABŞ-nin sanksiyalarına görə Hindistan Rusiyadan neft idxalını azaldıb. Bu taleyi digər ölkələrin də yaşaması mümkündür, amma birlikdə adekvat cavab da vermək zərurəti yaranır. Hər halda çox ciddi bir görüş və nəticələr gözlənilir".