İran parlamenti - İslam Məclisi rəsmi bəyanat yayaraq, Zəngəzur dəhlizinə qarşı sərt mövqe nümayiş etdirib.
Bəyanatda dəhliz “kollektiv təhlükəsizlik üçün birbaşa təhdid” kimi təqdim olunub. Məclisin açıqlamasında iddia olunur ki, Cənubi Qafqaz təkcə coğrafi məkan deyil, həm də İranın “təhlükəsizlik perimetri, strateji dərinliyi və sivilizasiya sahəsinin” tərkib hissəsidir. Parlament, Zəngəzur dəhlizi layihəsinin “tanınmış sərhədlərin dəyişdirilməsi və zorla koridorların yaradılması” anlamına gəldiyini bildirərək, bunun BMT Nizamnaməsinə zidd olduğunu qeyd edib.
İran tərəfi bəyan edib ki, belə addımlar “ölkənin təhlükəsizliyinə və milli maraqlarına təcavüz” kimi qiymətləndiriləcək və bütün siyasi-hüquqi vasitələrlə qarşısı alınacaq. Məclis həmçinin regionda hər hansı iqtisadi və tranzit layihəsinin yalnız “İranın geoiqtisadi mövqelərinə hörmətlə” mümkündürlüyünü vurğulayıb.
Açıqlamada daha da irəli gedilərək, Cənubi Qafqazın İrana “həyati əhəmiyyətli” olduğu, xarici dövlətlərin iştirakı ilə hər hansı əməkdaşlığın isə yolverilməz sayıldığı qeyd olunub. Bəyanat İran parlamentinin Azərbaycana qarşı qərəz və açıq düşmənçilik dolu mövqeyinin yeni nümunəsi kimi qiymətləndirilir.
Millət vəkili Sahib Alıyev Sherg.az-a açıqlamasında İran Parlamentinin Zəngəzur dəhlizi ilə bağlı bəyanatının rasionallıqdan və həqiqətdən tamamilə uzaq olduğunu deyib:
“Azərbaycanla Türkiyə aydındır, Ermənistanın da maraqlarına qətiyyən cavab verməyən, prezidentlərinin, xarici işlər nazirliklərinin mövqeyi ilə üst-üstə düşməyən ziddiyyətli söz yığınıdır. Üstəlik, oradakı gizli hədə onu edənlərin potensiallarıyla bir araya sığmır və boylarını çox-çox aşır.
İran parlamentindəkilər Zəngəzur dəhlizinin işə düşməsini sərhədlərin dəyişdirilməsi kimi təqdim edərkən, görəsən, haralarıyla düşünürlər? Yaydıqları sənəddə bunu həm də "kollektiv təhlükəsizliyə birbaşa təhdid" olaraq dəyərləndirirlər. Maraqlıdır, burada hansı "kollektiv"dən söhbət gedir?
O söz yığınında iddia edildiyi kimi İranın geoiqtisadi marağına heç də Zəngəzur dəhlizi zərbə vurmur. Bu ölkənin həm geoiqtisadi, elə həm də geosiyasi maraqlarına ən böyük zərbəni, cənab Pezeşkian da bu yaxınlarda etiraf etdi, oradakı rejimin yeritdiyi yanlış siyasət vurur”.
