“Ermənistan Baş naziri Nikol Paşinyana qarşı impiçment prosesi başlayıb və onun sonu yalnız bir ola bilər: qələbə”.

Teleqraf xəbər verir ki, bunu impiçment prosesinin təşəbbüskarı, Ermənistan parlamentindəki “Şərəfim var” fraksiyasının rəhbəri Hayk Mamicanyan jurnalistlərlə söhbətində bildirib.

Onun sözlərinə görə, “Şərəfim var” fraksiyasından olan 6 deputat baş nazirə etimadsızlıq prosesinin başladılması üçün blankı imzalayıb.

“Qələbəyə aparan yol bütün mümkün konstitusion vasitələrlə lazımi sayda imza toplamaqdan keçir, həmçinin informasiya, küçə təzyiqi, siyasi təzyiq və sairdən”, - Mamicanyan bildirib.

Deputat əlavə edib ki, lazımi sayda imzalar toplandıqdan sonra məsələ parlamentdə müzakirəyə çıxarılacaq.

Baş nazirə etimadsızlıq məsələsi tələb olunan 36 imza toplanacağı təqdirdə parlamentdə müzakirə oluna bilər. Təşəbbüskar “Şərəfim var” fraksiyasının 6, “Ermənistan” fraksiyasının 28 deputatı imza verməyə hazır olduğunu bəyan edib. İki fraksiyanın imzaları cəmi 34 edir, məsələnin parlamentin gündəliyinə salınması üçün isə 2 imza çatışmır.

Təşəbbüsün parlament tərəfindən qəbul olunması, yaxud baş nazirin impiçment edilməsi üçün isə minimum 54 deputatın səsi lazımdır. Yəni bunun üçün hakim “Vətəndaş Müqaviləsi” fraksiyasının 18 deputatının da səsi lazım olacaq. Hakim fraksiyadan isə hələlik təşəbbüsə dəstək verən yoxdur.

“Şərəfim var” fraksiyası Nikol Paşinyana qarşı impiçment prosesin başladılması üçün iyunun 7-də Masis şəhərinin meri Davit Ambarsumyanın baş nazirliyə namizədliyini irəli sürüb.

Xatırladaq ki, “Şərəfim var” və “Ermənistan” bloklarının liderləri Ermənistanın sabiq prezidentləri Serj Sərkisyan və Robert Köçəryandır.