“Tarixin müxtəlif dövrlərində Qərbi Azərbaycandan yüz minlərlə azərbaycanlı deportasiya olunub. Bu insanların Qərbi Azərbaycana qayıdışı mümkündür və realdır”.

Bu fikirləri “Reytinq” qəzetinə açıqlamasında professor Qabil Hüseynli deyib.

Qabil Hüseynli də Qərbi Azərbaycanda deportasiyaya məruz qalmış ailənin üzvüdür:

“Babalarım Qərbi Azərbaycanda yaşayıb, ulu babam Şah İsmayılın dəftərxanasında işləyib. Ata-babalarımın mülki, torpaq sahələri, əzizlərimizin məzarları Qərbi Azərbaycandadır. Oralar erməni torpağı deyil, qədim türk torpaqlarıdır, bizimdir. Odur ki, Qərbi Azərbaycana qayıdış mövzusunun aktual olması tamamilə təbiidir”.

Q. Hüseynlinin sözlərinə görə, Osmanlı imperiyasının yanlışı və humanistliyi səbəbindən ermənilər Qərbi Azərbaycan ərazilərinə gəliblər. “Balkanlardan və digər ərazilərdən qovulan ermənilərə yazığı gələn Osmanlı imperiyası əvvəlcə onların Şərqi Anadoluda yerləşməsinə etiraz etməyib. Daha sonra ermənilər buradan Qərbi Azərbaycana sızmağa başlayıblar. Müəyyən müddət sonra isə yerli əhaliyə qarşı deportasiya siyasətinə rəvac veriblər. Ruslar Azərbaycana gəldikdən sonra ermənilərin mövqeyi möhkəmlənib və xislətlərinə uyğun olaraq yerli əhali-Azərbaycan türklərinə qarşı deportasiya siyasəti işə düşüb. Nəticədə tarixin müxtəlif vaxtlarında yüz minlərlə azərbaycanlı deportasiyaya məruz qalıb, mülkünü, evini və əzizlərini itirib”,- professor vurğulayıb.

Q. Hüseynli əlavə edib ki, yüz minlərlə insan Qərbi Azərbaycandan deportasiya edilib. İndi onların ümumi sayı iki milyon nəfərdir.
Müsahibimiz xatırladıb ki, Qərbi Azərbaycandan qovulan zaman azərbaycanlıların bəziləri öldürülüb, insanları ot tayalarına yığıb od vurublar: “Ermənilər tarixin hər cür vəhşiliyini soydaşlarımıza qarşı ediblər. Son illər Qarabağda bir neçə on min erməni yaşayıb, onları qovan olmayıb, öz xoşları ilə gediblər, hətta evlərinin döşəmələrini də söküb aparıblar. İndi onların bəziləri İrəvanda deyir ki, Qarabağa qayıtmalıyıq. Hətta bunun üçün iş aparırlar. Bu halda Qərbi Azərbaycandan deportasiya edilən yüz minlərlə insanın öz tarixi ata-baba torpaqlarına qayıtması niyə gündəm olmamalıdır? Mən hesab edirəm ki, bu məsələ daima gündəmdə saxlanılmalıdır”.

Q. Hüseynli ümid edir ki, azərbaycanlılar tarixi torpaqlarına qayıdacaqlar: “Elə bu səbəbdən də ermənilər çəkinirlər. Bilirlər ki, yaşadıqları torpaqlar onların deyil, həmin torpaqlar öz tarixi sahiblərini gözləyir və bu istiqamətdə aparılan siyasət tamamilə doğrudur”.